Zbulohen manovrat e Ramës/ Si po kërkon të përjashtojë Metën dhe Berishën nga zgjedhjet

2022-08-01 16:50:00, Politikë CNA

Zbulohen manovrat e Ramës/ Si po kërkon të përjashtojë

Foto montazh - Ilir Meta dhe Sali Berisha

Publikimi i dojses së spiunit I.M. ka shkaktuar një debat të gjerë politik, nga i cili janë ngritur shumë aludime për ish-presidentin Ilir Meta.

Së fundmi në media është hedhur një hipotezë se zbulimi i kësaj dosjeje ka si plan pengimin e kandidimit në zgjedhje të Metës, aktualisht kryetar i Partisë së Lirisë dhe kreut të Partisë Demokratike, Lulzim Basha.

Kjo hipotezë është ngritur nga Top Channel. Ky televizion e ka marrë indicien nga burimet në PS dhe nga një frazë e shënimit të gjatë që kryeministri Edi Rama bëri dy ditë më parë për spiunin I.M.

“Kuvendi duhet të diskutojë mbi idenë e hedhur që edhe spiunët e Sigurimit të kthehen në subjekte të Ligjit për Pastërtinë e Figurës së të Zgjedhurve (i quajtur ndryshe Ligji i Dekriminalizimit)”, shkruante Rama, duke paralajmëruar ndalimin e kandidimit të Metës në zgjedhje.

Ndërkohë, Top Channel paralajmëron se e njejta gjë do të ndodhë edhe për Berishën, me anë të një klauzole që mund të shtohet në amendimin e ligjit.

“Shumica socialiste me këtë operacion të nisur në emër të pastrimit të politikës nga bashkëpuntorët e ish sigurimit të shtetit tenton që me një gur të vras dy zogj. Të diskreditojë dhe të ndalojë nga kandidimi politikanin I.M për të cilin autoriteti dosjeve thotë se është ish presidenti Ilir Meta, gjë të cilën ai e mohon kategorikisht.

Nga ana tjetër të largojë njëherë e mirë nga parlamenti e ti jap fund të qënurit deputet të Non Gratës amerikane Sali Berisha”, thuhet në një kronikë të televizionit. (shikoje videon këtu).

Kështu, kjo media e ka parë publikimin e kësaj dosjeje si një lëvizje të Edi Ramës për të përjashtuar Metën dhe Berishën nga zgjedhjet./ B.A. – CNA.al