Seancat maratonë në Kuvendin e Shqipërisë/ Projektligjet që krijuan debatet më të nxehta në parlament

2022-12-30 16:00:00, Aktualitet CNA

Seancat maratonë në Kuvendin e Shqipërisë/ Projektligjet

Foto ilustruese

Gjatë vitit 2022 ka patur shumë seanca në parlament që kanë zgjatur me orë të tëra, të shoqëruara me debate të forta mes mazhorancës dhe opozitës.

Një prej tyre ishte ajo për projektligjin për hapjen e dosjeve të ish-Sigurimit të shtetit.

Seanca zgjati më shumë se 12 orë dhe u shoqërua me debate mes deputetëve, por në fund u miratua me 94 vota pro dhe 1 abstenim.

Miratimi i projektligjit u abstenua vetëm nga një deputet, ndërsa nuk u dha asnjë votë kundër, ndonëse në seancë plenare nuk votuan 45 deputetë.

Projektligji erdhi pas kërkesës së Autoritetit për Informin mbi Dokumentet e ish-Sigurimit të Shtetit pasi doli dosja se një person me iniciale I.M. rezultonte të ishte bashkëpunëtor i ish-Sigurimit të Shtetit.

Por ky projektligj ishte vetëm një nga temat që krijoi debate të forta dhe të ashpra mes opozitës dhe mazhorancës.

Një tjetër seancë maratonë ishte ajo për Projektin e Portit të Durrësit.

Kuvendi miratoi me 74 vota pro dhe 35 kundër, ndërtimin e Portit Turistik që do të kushtojë 2.1 miliardë euro.

Të pranishëm në sallë ishin 107 deputetë, por kryeministri Edi Rama mungoi. Në përfundim të votimit, socialistët duartrokitën në atë që e quajtën një "marrëveshje që do t'i sjellë vendit një bum ekonomik"

Debatet në Kuvend kanë qenë të ashpra dhe shpesh të shoqëruara me akuza e kundërakuza, me replika e kundëreplika.

Protagoniste në 10 orët e diskutimeve ishte zv.kryeministrja Balluku, e cila është përplasur me pothuajse të gjithë deputetët më të ashpër të opozitës, si nga krahu i Berishës ashtu edhe nga ai i Alibeajt.

E përforcuar me shumë argumente teknike lidhur me projektin, edhe për shkak edhe të rolit të saj si propozuese e këtij projekti, Balluku i është përgjigjur debatit në të gjitha nivelet, madje edhe në atë familjar, ku sërish nuk kanë munguar replikat, veçanërisht me deputetin Edmond Spaho.

Porti i ri turistik i Durrësit, theksoi Balluku nga foltorja e Kuvendit, është investimi më i madh në Shqipëri që do të ketë një impakt të rëndësishëm në ekonominë e vendit, por edhe të rajonit. Parashikohet të hapen 12 mijë vende të reja pune dhe do të jenë mbi 1.3 miliardë euro të ardhura në buxhetin e shtetit në 20 vitet e ardhshme.

Ndryshe nga sa është akuzuar nga opozita, zëvendëskryeministrja siguroi se e gjithë zona ku do të shtrihet projekti do të jetë e hapur dhe e aksesueshme nga cilido qytetar e vizitor dhe se do edhe një hapësirë prej 700 metrash plazh publik.

Një investim që do të ndryshoj faqen e Durrësit dhe të gjithë vendit, por njëkohësisht do ta bëjë qytetin e Durrësit me dy porte.Një tjetër seancë maratonë ishte për Buxhetin e Vitit 2023.

Projektbuxheti është miratuar me 76 vota pro, 40 deputetë kanë votuar kundër, ndërsa nuk ka pasur asnjë abstenim. Seanca e Kuvendit ka zgjatur dy ditë. Gjatë këtyre dy ditëve ka pasur përplasje dhe debate mes opozitës dhe mazhorancës.

Qeveria shprehej se ky buxhet është parashikuar që të ndihmojë familjet në nevojë si dhe premtuan se do të ketë rritje pagash në fillim të vitit të ardhshëm në disa sektorë, duke nisur me policët, mësuesit, zjarrfikësit. Ndërkohë opozita ka kundërshtuar duke u shprehur se qeveria ka hartuar një buxhet që nuk favorizon aspak qytetarët, por oligarkët./CNA.al