“Merret me halle personale”/ Si Ina Zhupa sulmonte Berishën, sot i shkon nga pas

2022-12-07 18:46:00, Politikë CNA

“Merret me halle personale”/ Si Ina Zhupa sulmonte Berishën,

Deputetja e Partisë Demokratike, Ina Zhupa

Ina Zhupa është një nga deputetet e Partisë Demokratike që sot është rreshtuar krah kryetarit të PD-së Sali Berisha dhe flet me superlativa për të.

Por një vit më parë, kur Lulzim Basha ishte kryetar i PD-së, Zhupa ishte një mbështetëse e Lulit dhe sulmonte publikisht Sali Berishën.

Me një status në rrjetet sociale, më 15 dhjetor të vitit 2021, Zhupa reagonte ashpër për tensionet në selinë blu, kur Albana Vokshi dhe Evi Kokalari shkuan për të organizuar mbledhjen e LDG-së.

Asokohe, deputetja ngrinte akuzat se situata e krijuar në PD ishte shkaktuar nga Albana Vokshi dhe Sali Berisha.

Sipas saj, Vokshi dhe Berisha po merreshin me halle personale për të larguar vëmendjen nga afera e inceneratorëve.

“Në ditën kur duhet ngritur zëri dhe reagimi për skandalin e inceneratoreve, Sali Berisha dhe Albana Vokshi gjejnë kohën të merren me hallet personale duke larguar vëmendjen nga skandali i korrupsionit disa miliona eurosh.

Le të pyesin veten pse nuk flasin për këtë skandal? Pse përpiqen të largojnë vëmendjen nga përfshirja e zyrtareve më te lartë të qeverisë?! Pse nuk i shqetëson ky fakt?!”, shkruante Zhupa.

Këtë status tashmë deputetja e ka fshirë nga rrjetet sociale dhe shfaqet në publik krah kreut aktual të PD-së, sikur të mos e kishte sulmuar kurrë./ B.A. - CNA.al