Gazetari “shuplakë” Metës/ “Opozitari” që u ble me para droge dhe që mbajti Ramën në pushtet

2022-07-26 16:27:00, Politikë CNA

Gazetari “shuplakë” Metës/ “Opozitari” që

Gazetari Enkel Demi

Pas dorëzimit të mandatit të Presidentit, Ilir Meta mori drejtimin e partisë që themeloi në vitin 2004, të cilës nga Lëvizja Socialiste për Integrim ia ndryshoi emrin në Partia e Lirisë.

Lidhur me këto zhvillime ka reaguar ashpër gazetari Enkel Demi, i cili nuk i ka kursyer sulmet ndaj Metës.

Me anë të një statusi në rrjetet sociale, Demi thotë se nuk do ta ngrinte zërin nëse këta që sot bëjnë si “opozitarë” do të rrinin në skutat e tyre, por thekson se nuk mund të heshtë kur shikon që ringrihen në organet drejtuese të opozitës.

Ai deklaron se pikërisht këta persona që bëjnë sot opozitë, u blenë me paratë e drogës të dhëna në dorë ose me leje ndërtimi, tendera e koncesione të tjera dhe ndihmuan kryeministrin Edi Rama të rrinte në pushtet e të instalonte regjimin.

“Padyshim mbështes gjithkënd në opozitë që përpiqet të largojë klikën në pushtet.

Por, nuk mundem të kapërdij ata “opozitarët” që ndihmuan Edi Ramën të ndryshonte Kushtetutën, të instalonte regjimin, të prishë çdo lloj mekanizmi demokratik që bazohet në votë. Praktikisht, me zgjedhje sot është e pamundur ta përmbysësh këtë regjim, falë këtyre kolaboracionistëve. E vetmja Rrugë për të ndryshuar pushtetin për fat të keq nuk janë më zgjedhjet, por Rruga. Ligji zgjedhor që imponoi "Rilindja" me votat e këtyre, sido që ta rrotullosh i kthen votimet në farsë.

Këta “opozitarë” u blenë me paratë e drogës të dhëna në dorë ose me leje ndërtimi, tendera e koncesione të tjera.

Nuk do flisja për ta, nëse sot do të vazhdonin të jetonin në skutën e tyre duke ecur me parimin se çdokush në këtë vend e ka një çmim, por kur i rishoh të ringjiten në organet drejtuese të opozitës së sotme nuk di, mbetem pa fjalë.

Përnjimend këta nuk i honeps dot, kur i shoh në tubime, tribuna, foltore, kurse militantët që para pak muajsh qenë gati t’i shkonin në hu, sot i duartrokasin ethshëm.

Kjo është po aq perverse sa punët e regjimit.

Me gjasë është e fundit herë që flas për opozitën, se del e tepron Propaganda e shtetit që u instalua, falë këtyre njerëzve, të cilët sot po na "qajnë" për demokracinë që e therrën sikur me qenë dashi i librit “Kurbani”.

Edi Rama dhe krijesa e tij e neveritshme, e quajtur “Rilindje” është sot në pushtet, sepse sa herë i vinte dita dilte nga bataku, falë segmenteve që blinte në opozitë. Padyshim mbështes gjithkënd në opozitë që përpiqet të largojë klikën në pushtet”, shkruan gazetari./ B.A. – CNA.al