Kiko miraton programin/ Koncert në vitin '22!

2022-07-27 20:29:00, Opinione Lutfi Dervishi

Kiko miraton programin/ Koncert në vitin '22!

Foto ilustruese

Majmuni Kiko u njoftua së fundmi se ka rënë viktimë e fake news. Më 28 korrik qeveria nuk do të nxjerrë njerëzit në shesh për protestë, por për... koncert. Gjithsesi Kiko u habit për ftesën e personalizuar që mori në dorë nga korrieri i Kryeministrisë i cili lëviz me patina nëpër Tiranë në kuadër të masave qeveritare për të kursyer sa më shumë. Lexoi me një frymë programin e Koncertit dhe kur mbërriti te kënga e fundit aty mbeti pa frymë!

Duke hedhur vështrimin nga ishulli Korfuzit që kishte përballë, Kiko kroi kokën me putrën e majtë dhe ju kujtua një thënie e Pitagorës:

"Qëllimi më i lartë i muzikës është të lidhë shpirtin e njerëzve me natyrën e tyre hyjnore, jo argëtimi."

-Ky duhet të jetë dhe objektivi Koncertit të madh! - bërtiti Kiko.

PROGRAMI “KONCERT NË FUND TË KORRIKUT”

“Tate tate du fuston,

Ta pret Tata për Berom!”

(Kori i bashkuar)

“Balone tauke ne, blemë në Burrel

E morëm satën për t’shku në Bruksel!”

(Popullore: Këngë dhe valle)

“Ndrit Shqipëria o nga gëzimi/ngremë sot dolli rroftë integrimi!”

(Grupi Skërficës)

“Ushtrojnë brigjet e Atlantikut, prej liderit të Adriatikut!”

(Popullore)

“Satelitiii shkon kudooo,

Emrin tënd e mban mbi shpinë,

Ja Ahbeni thonë kudo

Paska bërë sot një gabim...”

(Grupi i fëmijëve)

30 ditët e RAMAzonit,

As kam hongër, as kam pi!

Kur të vij dita e Beromit,

Ne BE-në do kemi m’shpi!

(Kori i bashkuar)

“Presidenti s’është më vakant,

Shtabi përgjithshëm, pa komandant!”

(Kori i ushtrisë)

“Ah Belindë moj lanete,

Mendo moj pak për vete,

Mbi rrugë e tunele u trete.

Në kantiere, aty mbete!

(Këngë baritore e Llogarasë)

“Fushat tona me kanale

Do hamë bukë integrale!”

(Ansambli Myzeqeja)

10.

“Mbahu nëno mos ki frik’,

S’të mposht sulmi kibernetik!”

(Shqiptarët e Amerikës)

11.

“Dasmë të madhe ka Shqypnia,

Po dalldiset prej gëzimit,

Po këndon fort djelminia”

Hapim dosjen e sigurimit!”

(Ansambli, Shtëpia me Gjethe)

12.

“Doli prilli erdhi maji

U bë Durrësi si Dubai!”

(Kori i Spitallës)

13.

“Spiropali heshtjen theu,

Para Edi, pas Skënderbeu!”

(Grupi i PS-së)

14.

“Sa të jetë Niko mavria,

Flakë e hi tërë Shqipëria!”

(Grupi Lira i Korçës)

15.

“Armiqve do t’u vijmë hakut,

Që të gjithë tek dera e SPAK-ut!”

(Grupi i burgut të Reçit)

16.

“Në qeveri meritojmë vend,

Dimë të vjedhim me më mend!”

(Xhepistët e burgut të Shënkollit)

17.

"Këtu linda, këtu mbeta,

Tungjatjeta Ilir Meta!"

(Grupi: “Pika e Parë e Kazanit”)

18.

"Dritë e bëre këtë ven'

Dritë qofsh z.Arben,

Dritë i dhe ti shtëpive,

O ministër i fatkeqësive!"

(Grupi i ustallarëve të rindërtimit)

19.

“Incentatori, shokë incineratori,

Më të mirët na i mori,

I copëtoi i kapërdiu,

Si të ish Lubi Saliu!”

(Kori i bashkuar)

20.

“Investitor strategjik, o djalë dai,

Ç’pate plëng e pasuri,

I shkrive për këtë Shqipëri!”

(Kori i pleqve të azilit)

21.

“Policia është më ne,

Është sot, ka qenë dhe dje!”

(Ansambli blu)

22.

“Me shumë shqiptarë vrau vettingu

Se rus fieldmarshall Geringu!”

(Grupi i ish-gjyqtarëve dhe prokurorëve)

23.

"Hënë e kuqe mbi vatan,

Zemra buçet: Erdogan!"

(Gylenistët e Pavarur)

24.

“Ah Evropë moj zonjë e mirë,

Tani s'të themi qelbësirë!”

(Grupi i Patronazhistëve)

25.

"Mos kujtoni se s'kemi punuar,

Ngado kemi komentuar,

Mos na thënçin punëmbaruar.

Çdo armik kemi dërrmuar!”

(Grupi i KomentuesitQëDuam.al)

26.

“Ti o det o det i gjerë,

Plot me ndjenja ëndërrime,

Dashurinë për gjyqin n’Hagë,

Ma rrënjosi partia ime!”

(Kiko dhe fëmijët e Sarandës)

27.

“Ku lind dielli, e praron hana

“Open Ballkan” s'ban ma nana

Tre udhëheqës me Jatagana

Po u prin sot Edi Rama!”

(Të ftuar special: Rapsodët e Ballkanit)

28.

“O Putin, o hundllastik,

Poshtë Bashkimi Sovjetik!

Se këtu në vendin tim,

I thonë shqipe jo Ukrain’!”

(Grupi i Bënçës)

29.

“O Putin ore legen,

Prit Zelenskin se po vjen!”

(Grupi i Nish Tullës)

30.

“Mot me reshje e stuhi,

Po ja dole moj Shqipëri!

Desh na ngeli Bullgaria,

Por ia doli qeveria!”

(Grupi Skerficës i shoqëruar nga Kori Bashkuar)

Majmuni Kiko mbeti shumë i kënaqur që e kishin respektuar duke e bërë pjesë të “Koncert në fund të Korrikut”, por shprehu dyshimin për praninë e Çiljetës në Koncert.

Me pamjen e Sokratit të vuajtur shtroi disa pyetje:

-Sa mundësi ka që Çiljeta të sabotojë Koncertin?

-Mos është e infiltruara e Saliut?”

-Koncerti është për Europën apo EUROSONG?

-Me gjithë këto këngë e këngëtarë, a do të anulohet festivali i fundvitit në RTSH?

-Dyshimet e Kikos u shtuan kur shërbimi i një vendi partner e informoi se pas Pallatit të Kulturës Sali Berisha do të sillte: 2 Skoda, 5 Zisa dhe 8 Tatra, me motorët e ndezur me gazin deri në fund, që të prishë koncertin madhështor që mezi pritej.

Kiko i kërkoi bordit të naftës që asnjë pikë karburanti të mos furnizojë me naftë çfarëdolloj Skode, Zisi dhe Tatre këto ditë.

Ftesën për të kënduar e pranoi me kusht që himnin kombëtar në koncert ta këndojë z.Basha “meqë “ka kohë që nuk i është dëgjuar zëri”.

P.S; Në fund Kiko pati edhe një reflektim filozofik: Ka ardhur koha që shprehja “panem et circenses” të zëvendësohet me “negotiates et circenses”.