Izraeli godet Kishën Ortodokse në Gaza

2023-10-20 07:49:00, Kosova & Bota CNA

Foto ilustruese

Kisha Ortodokse Greke e Shën Porfirit është goditur nga një sulm ajror izraelit të enjten mbrëma, sipas Hamas.

Kampusi i kishës në qytetin e Gazës është në pronësi të Patriarkanës Ortodokse të Jerusalemit, e cila tha në një deklaratë se "mbeten të përkushtuar për të përmbushur detyrën e tyre fetare dhe morale në ofrimin e ndihmës, mbështetjes dhe strehimit për ata njerëz në nevojë, mes kërkesave të vazhdueshme izraelite për evakuim”.

“Të synosh kishat dhe institucionet e tyre, së bashku me strehimoret që ato ofrojnë për të mbrojtur qytetarët e pafajshëm, veçanërisht fëmijët dhe gratë që kanë humbur shtëpitë e tyre për shkak të sulmeve ajrore izraelite në zonat e banuara gjatë trembëdhjetë ditëve të fundit, përbën një krim lufte që nuk mund të injorohet.” thuhet në deklaratën e Patriarkanës.

Një sulm ajror izraelit shkaktoi shembjen e një prej ndërtesave që i përkisnin Kishës Ortodokse Greke në qytetin qendror të Gazës, tha Ministria e Brendshme dhe Siguria Kombëtare e kontrolluar nga Hamas në një deklaratë të enjten, duke shtuar se shumë njerëz që ishin strehuar në ndërtesë ishin të plagosur.

Forcat e Mbrojtjes të Izraelit (IDF) të premten pranuan se ihste goditur një kishë si rezultat i sulmit të IDF.

“Më parë sot, avionët luftarakë të IDF-së goditën qendrën e komandës dhe kontrollit që i përkiste një terroristi të Hamasit të përfshirë në lëshimin e raketave dhe mortajave drejt Izraelit”, tha IDF në një deklaratë për CNN.

“Qendra e komandës dhe kontrollit u përdor për të kryer sulme kundër Izraelit dhe përmbante infrastrukturën terroriste që i përkiste organizatës terroriste Hamas”, vazhdoi deklarata.

"Ne jemi në dijeni të raporteve për viktima. Incidenti është nën shqyrtim," thuhej në deklaratë.

“Hamasi vendos qëllimisht asetet e tij në zonat civile dhe përdor banorët e Rripit të Gazës si mburoja njerëzore”, tha IDF./ CNA