Rrahu qytetarin/ Vihet menjëherë në lëvizje Rrumbullaku, shkarkon shefin e komisariatit Pukë

2022-11-08 21:32:00, Aktualitet CNA

Rrahu qytetarin/ Vihet menjëherë në lëvizje Rrumbullaku,

Mbrëmjen e sotme, emisioni investigativ “Stop” ka denoncuar dhunën e përdorur nga ana e shefit të komisariatit të Pukës, Pjerin Lazrit ndaj një qytetari.

Menjëherë pas kësaj ka ardhur një reagim i menjëhershëm i Policisë së Shtetit.

Drejtori i Përgjithshëm, Muhamet Rrumbullaku ka shkarkuar nga detyra dhe ka përjashtuar nga radhët e bluve shefin e Komisariatit të Policisë së Pukës.

Policia njofton se ky vendim vjen për shkelje të rëndë të Kodit të Etikës dhe të komunikimit dhe për tejkalim të kompetencave, duke abuzuar rëndë me atributet që i jep ligji dhe detyra.

“Mbi rastin e transmetuar pak minuta më parë, në emisionin investigativ ”Stop”, në të cilin shfaqet shefi i Komisariatit të Policisë Pukë, shtetasi P. L., duke shkelur Kodin e Etikës dhe të komunikimit, si dhe duke goditur një shtetas, sqarojmë opinionin publik se:

“Të fus në dhe... Unë të marr jetën, mor by***ir”!/ Shefi i Komisariatit të Pukës rreh qytetarin
8 Nëntor, 20:45

Drejtori i Përgjithshëm i Policisë së Shtetit sapo është njohur me rastin, ka shkarkuar nga detyra dhe ka përjashtuar menjëherë, nga rradhët e Policisë së Shtetit, shefin e Komisariatit të Policisë Pukë, për shkelje të rëndë të Kodit të Etikës dhe të komunikimit dhe për tejkalim të kompetencave, duke abuzuar rëndë me atributet që i jep ligji dhe detyra.

Drejtori i Përgjithshëm i Policisë së Shtetit garanton qytetarët se është shumë i vendosur për të reaguar me ashpërsinë e ligjit ndaj kujtdo punonjësi policie që shpërdoron detyrën dhe që abuzon rëndë me uniformën e shenjtë të Policisë së Shtetit.

Policia e Shtetit është në shërbim të qytetarëve dhe si e tillë nuk mund të kenë vend në radhët e saj, punonjës policie që me veprimet e tyre abuzive shkelin liritë e të drejtat e qytetarëve dhe cënojnë besimin e mbështetjen e tyre, për mijëra burra, gra, djem dhe vajza të Policisë së Shtetit që përballen përditë me krimin dhe që punojnë e sakrifikojnë për të garantuar rendin dhe sigurinë publike”, thuhet në njoftimin e policisë/ B.A. – CNA.al