web counter
LEXO PA REKLAMA!

SHKARKO APP

App Store
Google Play

E fundit!

x

Zaptuesi i pronës në Piqeras del blof dhe zihet ngushtë nga gazetarja: Qenke bilbil nga goja, i ke mësuar ligjet

5 Tetor 2022, 21:22, Denoncim CNA

Zaptuesi i pronës në Piqeras del blof dhe zihet ngushtë nga

"Stop" trajtoi problemin e qytetarit Petrit Lulo në Piqeras, Bashkia Himarë, për një tokë që ia ka zaptuar komshiu i tij.

Ai nuk po mundet të rrethojë pronën e vetë, edhe pse ka një leje për këtë. Inspektori i policisë së zonës dhe polici bashkiak i pezullojnë punimet për rrethimin e pronës me pretekstin se ka një konflikt me palën tjetër, Eduard Veliun, i cili në fakt është zaptuesi i tokës së Lulos dhe që për ironi të fatit punon në IKMT-në e Bashkisë Himarë.

Polici bashkiak i Himarës i thotë gazetares së Stop se do t’i prishë rrethimin qytetarit, kur në fakt kjo gjë nuk është fare në kompetencat e tij. Kompetencat e policit bashkiak në lidhje me pronat i specifikon më së miri edhe specialisti i policisë bashkiake të Tiranës.

“Në lidhje me pretendimet për pronën, çdo gjë që ka lidhje me pronën private policia bashkiake nuk ka kompetenca”, thotë specialisti i policisë bashkiake të Tiranë, Toni Beni.

Gazetarja e Stop pyet zaptuesin e rrugës, Eduard Veliu, se çfarë dokumentesh ka për tokën. Ai pretendon se ka përfituar servitutin me vendim të Këshillit Bashkiak në vitin 2014, por nuk tregon asnjë dokument për këtë.

“Ka një servitut kalimi nga këshilli bashkiak i asaj kohe dhe nga Prefektura. Unë i kam dorëzuar letrat dje. E kam në proces legalizimi. Sa për informacion, kjo është tokë e rrëshkitshme. Dhe këtë tokë e kam mbajtur unë sepse më rrezikonte te shtëpia. Dhe ky zotëria nuk ka leje për atë gardh që po bën. Qenke bilbil nga goja ti, i paske mësuar shumë mirë ligjet ti”, shprehet  Eduard Veliu.

Për të konfirmuar se çfarë dokumentesh ka Eduard Veliu, gazetarja e Stop, Odeta Gjevori, iu drejtua Bashkisë së Tiranës. Në një komunikim në telefon me shefin e Urbanistikës në këtë bashki, ky i fundit shprehet skeptik që Eduard Veliu të ketë dokumentin që pretendon nga ana e Bashkisë së Himarës.

Sipas tij, dokument për servitut kalimi nuk aplikoheshin shpesh nga Bashkia e Himarës, pikërisht për faktin se shkaktojnë konflikt mes palëve.

“Ka marrë ndonjë gjë nga bashkia ky personi se mua s’më tingëllon i njohur si emër domethënë. Ka ndonjë shkresë? Këshilli Bashkiak, të paktën në dijeninë time që nga 2015 nuk jep më servitute. Nga 2015 e këtej ajo ka kaluar në Kodin Civil, dhënia e sevitutit. Pra, gjithmonë me vendim gjykate. Më përpara miratohej në Këshill Bashkiak servituti i kalimit. Pra kur dikush kishte një shtëpi dhe nuk shkonte dot apo dikush kishte një tokë bujqësore ta punonte dhe nuk shkonte dot. Këto ishin dy rastet. Në qoftë se ka, sipas atij, një vendim të Këshillit Bashkiak që atij i lejohet servituti i kalimit në një skicë përkatëse bashkangjitur, ai duhet ta paraqesi te ju. Zakonisht Këshilli Bashkiak i ka shmangur këto historisë e servituteve sepse gjithmonë sjellin konflikte dhe duke qenë se zonat janë të pa menaxhuara nga ana e pronësisë gjithmonë ka pasur probleme mbivendosje interesash dhe pretendimesh. Kështu që Këshilli Bashkiak vetëm në ndonjë rast shumë ekstrem mund të ketë marrë ndonjë vendim. Në raste të tjera i shmang këto se mund të ndodhi t’i zgjidhë në terren. Bashkia e Himarës në 2015 është bashkuar me zonën e Lukovës. Ai po e ka marrë para 2015, i bie ta ketë marrë nga Këshilli Bashkiak i Lukovës që ka qenë komuna e Lukovës dikur”, thotë shefi i Urbanistikës në Bashkinë e Himarës, Gentian Stratobërda.

Emisioni Stop ka bërë kërkesë zyrtare për të marrë informacion lidhur me dokumentet dhe do ta ndjekë deri në fund problemin e qytetarit Petrit Lulo të cilit i kanë zaptuar tokën. /tvklan.al





Lajmet e fundit nga