LEXO PA REKLAMA!

SHKARKO APP

Ndërtohet bateria e parë me rërë

9 Gusht 2022, 09:02, Blog CNA

Ndërtohet bateria e parë me rërë

Në imagjinatën e përbashkët të njerëzve, kalimi nga energjia aktuale me burim kryesisht lëndët djegëse fosile tek energjitë e gjelbra dhe të rinovueshme, kërkon një teknologji fantastiko-shkencore, si dhe miliarda euro investime.

Por nuk është gjithmonë kështu, pasi nganjëherë diferencën mund ta bëjë një ide e mirë dhe një ekspertizë teknike cilësore. I tillë është rasti i Marku Ilonen dhe Tomi Eronen, dy inxhinierë të rinj finlandezë, që kanë zhvilluar së fundmi baterinë e parë me rërë.

Pila e nxehtë

E keni kuptuar drejt: Akumulatori i ndërtuar nga Ilonen dhe Eronen nuk përdor litium ose materiale të tjera të rralla dhe të kushtueshme, por rërën e zakonshme që përdoret në ndërtim. Bateria me rërë nuk është gjë tjetër veçse një cilindër i madh me material izolues, i cili përmban brenda një sërë rezistencash elektrike dhe 100 ton rërë.

Rezistencat ngrohen duke e përdorur energjinë e tepërt të prodhuar nga panelet fotovoltaike, termocentralet e erës ose burime të tjera të rinovueshme. Në këtë mënyrë rëra ngrohet në një temperaturë prej rreth 500 °C. Nxehtësia e lëshuar gjatë natës apo në periudha kur burimet e gjelbra nuk prodhojnë energji të mjaftueshme, përdoret për të ngrohur ujin që e ushqen sistemin e ngrohjes qendrore të qytetit finlandez Kankanpa.

Efikase dhe ekonomike

Sipas projektuesve, akumulatori i rërës është zgjidhja ideale për të grumbulluar tepricën e energjisë së prodhuar nga burimet e rinovueshme. Është i lirë në aspektin e kostos, dhe mund të mbajë nxehtësinë në një temperaturë të qëndrueshme për disa muaj.

Dhe në dallim nga bateritë tradicionale, nuk vuan nga problemet e dobësimit të performancës me kalimin e kohës. Një aspekt tjetër që duhet neglizhuar:nuk ka probleme me asgjësimin pasi të ketë përfunduar detyrën e tij.  Por nga ana tjetër, duhet pasur parasysh që sistemi i dy inxhinierëve të rinj ka disa të meta.

Për shembull, bateria e tyre bëhet shumë joefikase, nëse do të përpiqeni ta shndërroni nxehtësinë e grumbulluar nga rëra në rrymë elektrike. Është kjo arsyeja pse duhet të gjejmë mënyra që bëjnë të mundur përdorimin e nxehtësisë ashtu siç është.

Për shembull për të ngrohur ujin e destinuar për ngrohje apo pishina. Pasi e ndërtuar baterinë e tyre të parë në qytetin e tyre të lindjes, dy inxhinierët po kërkojnë fonde dhe financues, që t’i ndihmojnë që ta zgjerojnë projektin e tyre në një nivel komercial.

Përkthyer dhe përshtatur nga CNA.al

Lajmet e fundit nga