Turizmi kulturor/Kalaja e Gjirokastrës më e vizituara në vend, nga parqet kryeson Butrinti

28 Gusht 2023, 11:54, Aktualitet CNA

Kalaja e Gjirokastrës

Interesi për Shqipërinë turistike është shpërfaqur në të gjitha dimensionet këtë vit duke nisur nga turizmi i aventurës tek ai kulturor dhe i rërës dhe detit.

Rritja e shpejtë e numrit të vizitorëve të huaj, ku në 7 muaj sipas INSTAT 5.2 milionë shtetas hynë në territorin tonë, parasheh një rekord historik deri në fund të vitit. Rrjedhimisht një shifër e tillë do të thotë edhe më shumë vizitorë në institucionet e kulturës në vend.

Të dhënat zyrtare të Ministrisë së Turizmit dhe Mjedisit tregojnë për një rritje me 67% të turistëve në këto institucione në qershor 2023 krahasuar me të njëjtën periudhë të një viti më parë. Si 6-mujor, gjashtëmujori i parë i 2023-shit shënon një rritje totale me 53% të vizitorëve në insitucionet e kulturës krahasuar me të njëjtin 6-mujor të një viti më parë.

Por cilat janë në fakt kalatë më të vizituara në vend, Parqet Kombëtare dhe ato Arkeologjike?

“Gjatë muajit qershor 2023 numri i vizitorëve në institucionet e kulturës është rritur në 67% krahasuar me vitin 2022. Numrin më të madh të vizitorëve e ka Kalaja e Gjirokastrës, ndjekur nga Parku Kombëtar i Butrintit dhe Parku Arkeologjik i Shkodrës.

Më poshtë po japim tabelën e vizitueshmërisë së institucioneve të kulturës të krahasuar në dy vitet e fundit. Në lidhje me të ardhurat nga vizitorët në Institucionet Kulturore për këtë muaj rezulton që të jenë përfituar 98,181,240 lekë, vlerë kjo 62% më shumë se të ardhurat e muajit korrik të vitit 2022”, thuhet në një përmbledhje të Ministrisë së Turizmit dhe Mjedisit që ka për burim të dhënat e marra nga Ministria e Kulturës.

Konkretisht Kalanë e Gjirokastrës në 6-mujorin e parë të vitit e kanë vizituar 50.6 mijë vizitorë, më shumë se dyfish në raport me të njëjtën periudhë të 2022-shit. I dyti në këtë kategori është Amfiteatri i Durrësit me 9 mijë vizitorë dhe një rritje me 64% në raport me 6-mujorin 2022.

E treta për nga numri i vizitorëve deri në qershor është Kalaja e Porto Palermos.

Lidhur me institucionet të kategorizuara si kala e monumente të tjera, Parku i Butrintit është ai që ka vëmendjen më të madhe.

Në janar-qershor të paktën 37.2 mijë turistë kanë vizituar këtë park, ndërsa nga Parqet Arkeologjike në krye qëndron Parku Arkeologjik i Shkodrës me të paktën 53 mijë vizitorë apo 30% më shumë vizitorë në janar-qershor 2023 krahasuar me të njëjtën periudhë të një viti më parë./Marrë nga Monitor