LEXO PA REKLAMA!

SHKARKO APP

“Transferim i detyruar”/ KLGJ sjell anëtaren e vet nga Kurbini në Tiranë

23 Shkurt 2023, 13:30, Aktualitet CNA

“Transferim i detyruar”/ KLGJ sjell anëtaren e vet nga Kurbini

Në një mbledhje të 31 janarit 2023, Këshilli i Lartë Gjyqësor vendosi me votë unanime të anëtarëve të pranishëm që të transferonte anëtaren e vet, Marçela Shehu, nga Gjykata e Kurbinit në atë të Tiranës – ndonëse ligji për “Organet e qeverisjes së sistemit të drejtësisë” u ndalon anëtarëve të Këshillit që të transferohen apo promovohen deri tri vjet pas përfundimit të mandatit në KLGJ.

Neni 4 i ligjit detyron kthimin e anëtarit të KLGJ-së në vendin e mëparshëm të punës dhe ndalon lëvizjen paralele- një parashikim ky që duket se synon të shmangë konfliktin e interesit.

“Anëtari gjyqtar, në përfundim të mandatit, kthehet në vendin e mëparshëm të punës. Anëtari gjyqtar i Këshillit nuk mund të transferohet, të ngrihet në detyrë ose të delegohet gjatë 3 viteve pas përfundimit të mandatit,” thuhet në ligj.

Por pavarësisht këtij detyrimi ligjor, Këshilli i Lartë Gjyqësor pretendon se nuk ka vepruar në kushtet e konfliktit të interesit, por se ka bërë ‘transferim të detyruar’ të gjyqtares Shehu nga Kurbini në Tiranë, për shkak se ajo gjendej jashtë strukturës organizative të gjykatës ku ishte emëruar.

Marçela Shehu ka përfunduar studimet në Shkollën e Magjistraturës në vitin 2007 dhe punon prej asaj kohe si gjyqtare e Gjykatës së Kurbinit. Ajo u zgjodh anëtare e Këshillit të Lartë Gjyqësor në fund të vitit 2018 si përfaqësuese e gjykatave të shkallës së parë.

Këshilli i Lartë Gjyqësor nuk sqaroi arsyet pse Shehu gjendej jashtë strukturës organizative të Gjykatës së Kurbinit, ku e ushtronte funksionin prej 15 vitesh, por KLGJ la të kuptohej se transferimi i saj në Tiranë i shërben plotësimit të vakancave të kësaj gjykate.

KLGJ i tha "BIRN" në një përgjigje me shkrim se kishte vendosur hapjen e një thirrjeje për 10 pozicione të lira në Gjykatën e Tiranës, për shkak të situatës në këtë gjykatë që ka vetëm 36 gjyqtarë nga 76 që duhej të kishte gjithsej.  Por para hapjes së thirrjes, Këshilli ka vendosur që të sistemojë më parë gjyqtarët që sipas tij ishin jashtë strukturave organizative të gjykatave ku ishin emëruar.

Këshilli e justifikoi gjithashtu lëvizjen me riorganizimin e gjykatave për shkak të hartës së re gjyqësore, ndonëse Gjykata e Kurbinit ku e ka emërimin Shehu do të bashkohet me Gjykatën e Lezhës.

“Pra në çdo rast, kur kemi riorganizim të gjykatave apo suprimim të pozicionit në strukturën organizative të gjykatave, Këshilli do të duhet të vijojë me transferimin e këtyre gjyqtarëve, në një gjykatë tjetër, të të njëjtit nivel,” përfundoi KLGJ./BIRN

Lajmet e fundit nga