“Të lirohen ambientet”/ Ministria e Financave i përgjigjet Hysenbelliut: Gazeta "Panorama" ka 6 vite pa paguar detyrimet

2 Shtator 2022, 15:37, Aktualitet CNA

“Të lirohen ambientet”/ Ministria e Financave i përgjigjet

Ministria e Financave dhe Ekonomisë

Ministria e Financave dhe Ekonomisë i është përgjigjur pak më parë Irfan Hysenbelliut, në lidhje me akuzat e tij për lirimin e ambienteve shtetërore të marra me qira nga grupi mediatik i ish-kapterit të kthyer në biznesmen.

Me anë të një statusi në rrjete sociale, Ministria e Financave deklaron se gazeta “Panorama” ka 6 vite pa paguar detyrimet.

"Në të njëjtën kohë, gazeta 'Panorama', pjesë e 'Focus Media News' që ushtron aktivitetin e saj në të njëjtat godina, rezulton të mos ketë paguar as detyrimet financiare kontraktuale prej 6 vitesh.

Deklarata e mediave të zotit Irfan Hysenbelliu, se gjykata e ka shpallur të paligjshme shkresën e MFE është një trillim.

Gjykata ka marrë një vendim pezullimi proceduarial të lirimit të godinave shtetërore, derisa çështja të trajtohet dhe zgjidhet me vendim gjyqësor të formës së prerë", thuhet ndër të tjera në reagimin e ministrisë.

Deklarata e plotë:

Në vazhdën e sulmeve të mbushura me trillime, të cilat kanë shënjestruar muajt e fundit institucionet e Tatimeve dhe Doganave, nga mediat e zotit Irfan Hysenbelliu, sot ka dalë një tjetër në adresë të MFE.

Sipas tyre, Kryeministri ka kërkuar lirimin e ambienteve shtetërore të marra me qira nga grupi mediatik i zotit Irfan Hysenbelliu për t'i mbyllur gojën mediave të tij. Kjo është një shpifje dashakeqe, si plot të tjera të prodhuara nga ky grup mediatik.

Bëjmë me dije se : Po, ka pasur një kontratë qiraje mes Ministrisë së Financave dhe Ekonomisë dhe “Focus Media Group”, e cila ka përfunduar në datën 25.07.2022.

Referuar kontratës së lidhur dhe konkretisht nenit 7 “Zgjidhja e kontratës”, pika 7.1, parashikohet që:

“Kontrata zgjidhet me mbarimin e afatit të përcaktuar në pikën 3.1 të kësaj kontrate”. Ministria e Financave dhe Ekonomisë, me cilësinë e subjektit qiradhënës, ka njoftuar subjektin përmes korrespondencës shkresore mbi përfundimin e afatit të kontratës së qirasë për godinat që duhet t'i kthehen shtetit.

Në të njëjtën kohë, “Gazeta Panorama”, pjesë e “Focus Media Neës” që ushtron aktivitetin e saj në të njëjtat godina, rezulton të mos ketë paguar as detyrimet financiare kontraktuale prej 6 vitesh.

Deklarata e mediave të zotit Irfan Hysenbelliu, se gjykata e ka shpallur të paligjshme shkresën e MFE është një trillim.

Gjykata ka marrë një vendim pezullimi proceduarial të lirimit të godinave shtetërore, derisa çështja të trajtohet dhe zgjidhet me vendim gjyqësor të formës së prerë.

MFE e respekton plotësisht këtë vendim dhe pret që gjykata t'i njohë shtetit të drejtën e tij për të rimarrë pronën që i takon.

Por kjo, as nuk ka lidhje me lirinë e mediave të zotit Irfan Hysenbelliu, as nuk e ndryshon faktin se zoti Irfan Hysenbelliu i përdor mediat e tij për të shantazhuar përfaqësuesit e shtetit dhe dizinformuar publikun, për të mbuluar problemet shumë serioze që bizneset e tij kanë me ligjin./ B.A. - CNA.al