Sandër Lleshaj, akuza Ramës/ Ja ku ka gabuar

26 Tetor 2022, 14:04, Aktualitet CNA

Ish-ministri i Brendshëm i Rilindjes, Sandër Lleshaj, në një dalje të tij të fundit televizive në emisionin "Log" të Endri Xhafos në "Abc News" ka mbajtur një qëndrim mjaft të fortë dhe të ashpër ndaj kryeministrit Rama.

Në gati 50 minuta intervistë ai nuk ka reshtur së dhëni argumente kundër Qeverisë, problematikave të saj dhe ato pika që ai i shikonte se Qeveria i kishte bërë gabim, se ka qenë një orientim i pastër politik i kryeministrit.

Së pari, Sandër Lleshaj foli për reformën në drejtësi.

Ai tha se Vettingu ishte një fjalë që i krijonte alergji.

Kjo dhe për një gabim të madh të këtij procesi që sipas Lleshajt, lidhet me faktin se barrën e provës që e kishin individët, të cilëve u bëhej Vettingu.

Nga ana tjetër ai tha se ky Vetting ishte i gabuar dhe shumë i vonuar.

Sandër Lleshaj, gjithashtu foli për Vettingun në polici, si pikë e dytë e kritikave ndaj kryeministrit.

Ai tha se nuk mund të bëhej një Vetting i tillë.

“Për qindra dosje prokurorësh dhe gjyqtarësh ka 7 vjet që nuk po mbaron Vettingu e do të duheshin me dhjetëra vite e shumë dekada që të mbaronte Vettingu në Polici”, tha Lleshaj, për të cilin ai theksoi se është një gjë e panevojshme.

Policia dhe trupa e policisë është një dinamikë e përditshme, e cila ka problematika, por nuk mund të zgjidhet në Vetting.

Së treti, Sandër Lleshaj theksoi edhe faktin se zgjedhjet administrohen në mënyrë të gabuar nga partitë politike dhe për sa kohë të jenë të tilla do të ketë problematika.

Ai theksoi se ato duhet të administrohen nga Ministria e Brendshme nga administrata, por kurrsesi nga partitë politike, të cilat, theksoi Lleshaj, janë si dy ekipe futbolli që i fut në fushë pa arbitër dhe pastaj çfarë pret të ndodhë.

Lleshaj ishte mjaft i ashpër me Qeverinë në qëndrimet e tij, jo vetëm për Vettingun në Polici apo reformën në drejtësi.

Ai i ashpër ishte edhe për çështjen e zgjedhjeve dhe administrimin e tyre. Por theksoi edhe diçka tjetër, se është politika ajo që keqpërdor policinë dhe është e lidhur me krimin.

Pasi politikës i duhen votat dhe përdor krimin e më pas ajo akuzat ia hedh policisë.

Kjo ishte dhe pika më e fortë dhe akuza më e drejtpërdrejtë që Sandër Lleshaj bëri ndaj Qeverisë, ndaj kryeministrit Edi Rama, i cili e ka pasur ministër në kabinet, por, ndoshta edhe për palën tjetër politike, për lidhjet e krimit me politikën, për të cilat ai ka pasur informacione të mjaftueshme, pasi ka qenë Ministër i Brendshëm.

Me gjithë sulmet e thella ndaj kryeministrit, Sandër Lleshaj la edhe diçka pa thënë. Të vertetën si iku dhe pse iku nga Ministër dhe a kishin lidhje dy ngjarjet, pra ajo e Klodjan Rashës dhe ngjarja e fundit e Laer Kurtit.

Megjithëse ishin krejt të kundërta dhe për ngjarjen e Rashës, Lleshaj theksoi se policia kishte gënjyer dhe ishte ndier shumë keq, pasi nuk ishte gjetur pistoleta, siç ishte deklaruar nga vetë policia e shtetit.

Lleshaj ishte i ashpër me kryeministrin, me qëndrimet e tij për gjithçka foli dhe gjithçka artikuloi në 50 minuta përballë Endri Xhafos në "Abc News", duke u sjellë jo si një opozitar i Sali Berishës, por si një opozitë ndryshe brenda Partisë Socialiste dhe megjithëse pesha e Lleshajt në PS është sa pesha e një ushtari në një luftë të drejtuar nga gjeneralët./CNA.al