Rruga e re Dhërmi-Sarandë, KPP heq pezullimin, ARRSH të vijojë procedurat

4 Shkurt 2025, 07:25, Aktualitet CNA

Rruga e re Dhërmi-Sarandë, KPP heq pezullimin, ARRSH të

Në gusht të vitit të shkuar, në një listë të gjatë projektesh ndërtimi për akse të ndryshme që shkonin disa dhjetëra miliona euro, në sy binte edhe një procedurë e Autoritetit Rrugor Shqiptar, për projektimin e asaj që u cilësua si “Rruga e Bregut”.

Bëhet fjalë për një rrugë të re, që do të lidhë Dhërmiun me Sarandën, dhe që zëvendëskryeministrja njëkohësisht ministre e Energjisë dhe Infrastrukturës, Belinda Balluku, e cilësoi si vazhdim të aksit të ri Palasë-Dhërmi.

Por nga gushti e deri në fund të janarit procedura në fjalë përfundoi e ankimuar dhe më pas e pezulluar derisa me një vendim të 30 janarit Komisioni i Prokurimit Publik vendosi heqje të pezullimit. Së fundmi, KPP autorizoi Autoritetin Rrugor Shqiptar të vijonte me procedurat e tjera për të lidhur kontratën me operatorin fitues.

Shkak për këtë zvarritje u bë mosdakordësia e një subjekti me vlerësimin që i ishte bërë procedurës nga Komisioni i Vlerësimit të Ofertave. Në tenderin me fond limit 810 mijë euro ishin paraqitur të paktën 12 oferta dhe pas vendimit të Komisionit një prej subjekteve kishte mosdakordësi me vlerësimin.

Në këto kushte KPP vendosi pezullimin dhe më pas i kërkoi ARRSH që të bënte rivlerësim. Pas kryerjes së kësaj të fundit duket se KPP ka vendosur që të japë dritën jeshile për vijimin e procedurës.

Rruga e re e Bregut

Rruga e re që pritet të projektohet dhe më pas të ndërtohet parashikon që të eliminojë kalimin në zonat e banuara duke hapur një gjurmë të re në pjesën kodrinore.

“Segmenti rrugor do klasifikohet si Kategoria C2 “Rrugë ndërurbane dytësore”, në përputhje dhe vazhdimësi edhe me segmentin rrugor tashmë të ndërtuar (Palasë – Dhërmi)” do të sqaronte më herët ARRSH në dokumentet e procedurës.

Pika e fillimit të këtij segmenti rrugor është rrethrrotullimi në fund të aksit rrugor Palasë – Dhërmi.

“Pika e fundit të këtij segmenti rrugor nuk është e përcaktuar saktësisht, por që duhet të jetë pranë qytetit të Sarandës.

Pika fundore do të përcaktohet në funksion të nevojave që rrjeti rrugor (Kardhiq – Delvinë, Bypass Sarandë, Shijan – Qafë Botë) dhe Bashkia Sarandë e Delvinë. Gjatësia e aksit të ri rrugor pritet të shkrutohet me 20-30%, si pasojë e përmirësimit gjeometrik të gjurmës së rrugës”, do të nënvizonte ARRSH.

Zonat ku kalon projekti

Si fillim projekti (km 0+000) do të merret fundi (rrethrrotullimin) i segmentit rrugor Palasë – Dhërmi.

Rruga e Bregut është e vetmja që lidh shumë zona të banuara bregdetare, ndër të cilat janë.

– Në km 2+700 ndodhet fshati Dhërmi.

– Në km 5+600 ndodhet fshati Ilias.

– Në km 6+200 ndodhet kryqëzimi për në Manastirin e Shën Teodorit.

– Në km 10+000 përfundon fshati Vuno.

– Në km 10+500 ndodhet kryqëzimi i Jalës.

– Në km 11+600 është fillimi i Qafës së Vishës dhe përfundon në km 13+400.

– Në km 13+950 fillon qyteti i Himarës.

– Në km 15+500 ndodhet kryqëzimi për në fshatin Livadh.

– Në km 16+600 fillon Bypassi i Himarës dhe përfundon në km 19+600.