web counter
LEXO PA REKLAMA!

SHKARKO APP

App Store
Google Play

E fundit!

x

Qeveria heq masat për ndalimin e "Tik Tok"-ut në Shqipëri/ Sqarim për opinionin publik

5 Shkurt 2026, 14:29, Aktualitet CNA

Qeveria heq masat për ndalimin e "Tik Tok"-ut në

Këshilli i Ministrave ka vendosur më 3 shkurt 2026 heqjen e masave të përkohshme për ndërprerjen e aksesit në platformën online "TikTok". Vendimi vjen pas një rivlerësimi institucional dhe adresimit të shqetësimeve që lidhen me sigurinë publike, sociale dhe digjitale, veçanërisht për fëmijët dhe të rinjtë.

Masat kufizuese, të miratuara në mars 2025, ishin konceptuar si një ndërhyrje parandaluese për mbrojtjen e interesit publik dhe shërbyen për hapjen e një dialogu të drejtpërdrejtë me platformën "TikTok". Si rezultat i këtij procesi, janë vendosur mekanizma të rinj sigurie, përfshirë filtra mbrojtës përmes fjalëve kyçe, kontrolle më të forta të përmbajtjes dhe përmirësim të mënyrave të raportimit të shkeljeve.

Autoritetet shqiptare bëjnë të ditur se vendimi shënon kalimin nga masa kufizuese në një fazë monitorimi aktiv dhe bashkëpunimi me platformat digjitale, duke synuar një ekuilibër mes lirisë së aksesit dhe mbrojtjes së të rinjve.

Paralelisht, institucionet po punojnë për një plan komunikimi dhe ndërgjegjësimi për përdorimin e sigurt dhe të përgjegjshëm të platformave online, me fokus te fëmijët, prindërit dhe mësuesit.

 

"Agjencia për Media dhe Informim sqaron median dhe opinion publik në lidhje me vendimin e Këshillit të Ministrave datë 03.02.2026 për heqjen e masave të përkohshme për ndalimin e aksesit në platformën online TikTok.

Heqja e masave të përkohshme për ndërprerjen e aksesit në platformën online TikTok është rezultat i një rivlerësimi institucional dhe i adresimit konkret të shqetësimeve që lidhen me sigurinë publike, sociale dhe digjitale, veçanërisht për fëmijët dhe të rinjtë.

Masa e miratuar nga Këshilli i Ministrave në mars 2025 u konceptua dhe u zbatua si një ndërhyrje e parandaluese, në funksion të mbrojtjes së interesit publik dhe adresimit të shqetësimeve të evidentuara gjatë asaj periudhe.

Ajo shërbeu edhe për të hapur një dialog të drejtpërdrejtë dhe konstruktiv me platformën, duke vendosur bazat për mekanizma të rinj sigurie, të cilët më parë nuk ishin të pranishëm. Sot, autoritetet shqiptare janë në partneritet me përfaqësuesit e TikTok, për  filtrat mbrojtës përmes fjalëve kyçe, kontrollet e përmbajtjes dhe modalitetet më efikase të raportimit dhe trajtimit të shkeljeve.

Ky vendim shënon kalimin nga masa kufizuese në një fazë monitorimi aktiv, bashkëpunimi ndërinstitucional dhe përgjegjësie të përbashkët me platformat digjitale.

Paralelisht, po punohet për hartimin e një plani të mirëfilltë komunikimi dhe ndërgjegjësimi, të fokusuar te fëmijët, të rinjtë, prindërit dhe mësuesit, për përdorimin e sigurt dhe të përgjegjshëm të platformave online. Qëllimi është i qartë dhe i orientuar drejt edukimit digjital, mbrojtjes reale dhe ndërtimi i një kulture sigurie në hapësirën online.

Kjo qasje e balancuar synon të garantojë lirinë e aksesit, duke vendosur njëkohësisht interesin e sigurisë dhe mirëqenies së të rinjve në qendër të politikave publike", thuhet në sqarim./ CNA





Lajmet e fundit nga