E fundit!

08:16 Aktualitet

Zjarr në fushën e mbetjeve në Krujë/ Tymi toksik përfshin zonën

Fusha e mbetjeve në Krujë është përfshirë nga flakët që ng...

Pagat e gjyqtarëve/ "Kushtetuesja" i jep afat Kuvendit

15 Prill 2026, 15:01, Aktualitet CNA

Gjykata Kushtetuese ka publikuar arsyetimin e plotë të vendimit për pagat e gjyqtarëve, duke i lënë Kuvendit të Shqipërisë një afat të qartë për të ndërhyrë me ndryshime ligjore.

Vendimi, i marrë më 17 shkurt me shumicë votash, pranon pjesërisht kërkesën e gjyqtarëve dhe thekson se paga e tyre nuk mund të ulet, as drejtpërdrejt dhe as në mënyrë të tërthortë. Megjithatë, mënyra konkrete e rregullimit i delegohet Kuvendit.

Sipas Kushtetueses, ligjvënësit duhet të miratojnë brenda 31 korrikut 2026 një formulë të re që garanton ruajtjen e nivelit të pagave dhe shmang çdo “ulje të fshehtë”. Kjo formulë mund të lidhet me ndryshimet në pagat e administratës publike, me nivelin e pagës së Presidentit, apo me tregues të tjerë të krahasueshëm ekonomikë.

Gjykata nënvizon se rregullimi duhet të respektojë parimet kushtetuese për pavarësinë e gjyqësorit, por njëkohësisht të marrë në konsideratë faktorë si inflacioni dhe zhvillimet ekonomike, që ndikojnë njësoj në të gjitha kategoritë e punonjësve.

“Kuvendi mund të zgjedhë të përshtasë formulën e re në mënyrë që të riparojë uljen e fshehtë ose duke iu referuar ndryshimit që pësoi kategoria e nëpunësve civilë në të cilët referonte formula e vjetër ose ndryshimit që pësoi paga e Presidentit, ose çdo zgjidhjeje tjetër të krahasueshme me ndryshimet e kategoritë e mësipërme dhe brenda limiteve të tyre, gjithnjë në respektim të garancive të nenit 138 të Kushtetutës, duke mbajtur në vëmendje edhe faktin që inflacioni dhe situata ekonomike kanë efekt të njëjtë mbi të gjitha kategoritë e punonjësve, pavarësisht detyrës dhe funksionit që kryejnë”, thuhet në vendimin e Gjykatës Kushtetuese.

Çështja u ngrit nga dy shoqata gjyqtarësh, të cilat kërkuan që pagat të indeksohen automatikisht në përputhje me rritjet në sektorë të tjerë shtetërorë, duke e konsideruar këtë si një garanci për funksionimin e pavarur të sistemit të drejtësisë./ CNA