Orientimi për karrierë i të rinjve/ Raporti nga KLSH: Nuk ka struktura të posaçme

19 Mars 2025, 18:21, Aktualitet CNA

Orientimi për karrierë i të rinjve/ Raporti nga KLSH: Nuk ka

Një auditim performance i bërë nga Kontrolli i Lartë i Shtetit, fokusohet tek “Orientimi për Karrierë i të Rinjve në sistemin arsimor parauniversitar”. Auditimi vlerëson se institucionet e përfshira në proces në hierarki, nga Ministria e Arsimit e deri tek institucionet e tjera të varësisë më periferike, nuk rezulton të kenë qenë shumë efektive në këtë proces.

Në raport theksohet se në strukturën dhe organikën e Ministrisë së Arsimit dhe Sportit, nuk ka njësi të dedikuara për orientimin e karrierës, që pasqyrohet dhe në rregulloren e brendshme të institucionit.

“Procesi i orientimit për karrierë i nxënësve nga institucionet përgjegjëse të sistemit të arsimit parauniversitar nuk ka rezultuar efektiv, si pasojë veçanërisht e mungesës së strukturave të dedikuara në institucionet përgjegjëse. Në strukturën dhe organikën e Ministrisë së Arsimit dhe Sportit, miratuar me Urdhrin e Ministrit 30, nuk ka njësi të dedikuara për orientimin e karrierës, gjë e cila pasqyrohet dhe në rregulloren e brendshme të institucionit”,- thuhet në raportin e audimit.

Në raport theksohet edhe një problematikë, siç është ajo e mungesës së stafit me përshkim pune të specifikuar.

“Edhe në institucionet e varësisë, Agjencinë Kombëtare të Arsimit Parauniversitar, drejtoritë rajonale dhe zyrat vendore të arsimit parauniversitar, nuk ka njësi të veçanta për orientimin e karrierës, por ky proces realizohet nga punonjës të stafit të caktuar nga eprorët, jashtë përshkrimit të tyre të punës”,-shkruhet në raport.

Gjithashtu, raporti i KLSH-së thekson se ka ende mungesë strukturash të posaçme, veçanërisht për arsimin e mesëm të lartë.

“Në institucionet arsimore të arsimit të mesëm të lartë, nuk ka struktura të posaçme të angazhuara me administrimin e procesit të orientimit të karrierës, ndërsa në Arsimin e Mesëm të Ulët ka filluar të institucionalizohet ky proces me daljen e Urdhrit të Ministrit të Arsimit dhe Sportit nr. 600, datë 19.10.2023',- thuhet në raportin e KLSH-së./CNA