E fundit!

13:13 Politikë

"Protestat arritje e madhe"/ Rama: Shqipëria e para në rajon për performancën mjedisore, e 46-ta në botë

Kryeministri Edi Rama në një postim të bërë në rrjetet soc...

Shpërdoroi detyrën/ Dënohet me shërbim prove ish-kryebashkiakja e Libohovës

19 Mars 2025, 13:31, Aktualitet CNA

Shpërdoroi detyrën/ Dënohet me shërbim prove

Gjykata e Posaçme e Apelit caktoi sot lënien në fuqi të vendimit të Shkallës së Parë për dënimin me 8 muaj burg të ish-kryebashkiakes së Libohovës, Luiza Mandi. Mandi akuzohet për shpërdorim detyre.

Apeli vendosi pezullimin e dënimit me burg, duke e konvertuar në 1 vit e 4 muaj shërbim prove.

Seanca u zhvillua këtë të mërkurë dhe çështja u trajtua me trup gjykues të përbërë nga gjyqtarët Miliana Muça (kryesuese), Engert Pëllumbi (anëtar) dhe Igerta Hysi (anëtare).

Hetimet për Mandin nisën pas një kallëzimi të bërë nga një qytetar, i cili pretendonte se në pronat e familjarëve të tij bashkia po zhvillon një projekt zgjerim rruge ku kishte pajtuar edhe firmën e konstruksionit për kryerjen e punimeve dhe zhvillimin e zonës. Qytetari kishte konstatuar se muri rrethues ishte shtrirë edhe në sipërfaqe të tjera të tokave në pronësi të tij.

Njoftimi i gjykatës:

Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Miliana Muça (kryesuese), Engert Pëllumbi (anëtar) dhe Igerta Hysi (anëtare), më datë 19.03.2025, shpalli vendimin lidhur me çështjen e regjistruar me nr. 12 akti, datë 20.01.2025 regjistrimi, mbi ankimin e ankueses/të pandehurës L.M., kundër vendimit nr. 38, datë 13.06.2024 të Gjykatës së Posaçme të Shkallës së Parë për Korrupsionin dhe Krimin e Organizuar, që ka vendosur:

Deklarimin fajtor të të pandehurës L.M., për veprën penale “Shpërdorimi i detyrës” dhe bazuar në nenet 49, 248 të K.Penal, dënimin e saj me 1 (një) vit burgim.
Në bazë të nenit 406 pika 1 të K.Pr.Penale, të pandehurës L.M., i ulet 1/3 e dënimit, për shkak të aplikimit të gjykimit të shkurtuar dhe përfundimisht dënohet me 8 (tetë) muaj burgim.
Vuajtja e dënimit fillon nga dita e ekzekutimit të këtij vendimi, të formës së prerë, dhe të kryhet në një burg të sigurisë së zakonshme.
Bazuar në nenin 35 paragrafi 2 të K.Penal, heqjen e të drejtës së të pandehurës L.M. për të ushtruar funksione publike për një kohë prej 5 (pesë) vjet.
Shpenzimet procedurale, ato gjatë hetimit të çështjes në vlerën 120.000 (njëqind e njëzet mijë) lekë si dhe ato të gjykimit, sipas formularit bashkëngjitur këtij vendimi, të paguhen nga e pandehura L.M.
Në përfundim, Gjykata e Posaçme e Apelit për Korrupsionin dhe Krimin e Organizuar vendosi:

1. Lënien në fuqi të vendimit nr. 38, datë 13.06.2024 të Gjykatës së Posaçme të Shkallës së Parë për Korrupsionin dhe Krimin e Organizuar, me ndryshimin:

- Në aplikim të nenit 59 të Kodit Penal, urdhërohet pezullimi i ekzekutimit të dënimit me burgim për të pandehurën L.M. dhe vënia në provë për një afat prej një vit e katër muaj, duke u detyruar e pandehura të mbajë kontakte me Degën Territoriale të Shërbimit të Provës Gjirokastër, në juridiksionin e së cilës ka vendbanimin, me kusht që gjatë kohës së provës të mos kryejë vepër tjetër penale.

- Në bazë të nenit 61 të Kodit Penal, urdhërohet e pandehura L.M. t’iu përgjigjet thirrjeve e kërkesave të organeve për mbikëqyrjen e provës.

2. Shpenzimet gjyqësore në gjykimin në apel i ngarkohen të pandehurës L.M./CNA