web counter
LEXO PA REKLAMA!

SHKARKO APP

App Store
Google Play

Një përgjigje Edi Ramës për Blendi Fevziun

13 Janar 2026, 11:23, Aktualitet REDAKSIONALE


Dikujt mund të mos i duket etike që të hysh në një debat mes një gazetari dhe kryeministrit, në një çështje e cila ka një ndjeshmëri publike. Blendi Fevziu, nga studio e "Opinionit", ka thënë se: "Ministrat çojnë kaseta, janë shtatë prej tyre që ndodhen jashtë, ndërkohë në Shqipëri tregohet sikur zhvillohen aktivitete".

Që Blendi Fevziu ka të drejtë, këtë kryeministri Rama e di, po ndoshta varet sa e shtrin në kohë, muajin e fundit apo me vite. Sepse nuk janë të pakta rastet kur kanë qenë gazetarët me ministrat nëpër udhëtime dhe ndërkohë gjatë kohës që kanë fluturuar nëpër aviona, në rrjetet sociale jepeshin inspektime të ndryshme.

Ne si CNA kemi publikuar nga të parët video dhe materiale të tilla. Sot po sjellim një rast flagrant. Rastin e kryebashkiakut Erion Veliaj.

Teksa CNA publikoi ekskluzivisht lajmin në orën 13:57, të 10 shkurtit 2025 për arrestimin e kryebashkiakut Erion Veliaj, ky i fundit bëri atë që bënte më së miri: Të “shesë” një aktivitet sikur të jetë "live".

Në 10 shkurt të 2025, në faqen zyrtare të Erion Veliajt në "Facebook", po transmetohej një aktivitet i Veliajt në Yzberisht, ndërkohë që në këtë kohë u bë arrestimi i kryebashkiakut në ambientet e Bashkisë së Tiranës, siç edhe u pa nga pamjet ku Byroja Kombëtare e Hetimit shoqëroi Veliajn nga Bashkia e Tiranës drejt burgut.

A nuk ishte Erion Veliaj në zyrë kur transmetohej videoja e arrestimit të tij? Kryeministri do të na përgjigjet: "Po, kjo do të thotë që ishte në zyrë. Nuk ka ikur pa leje jashtë dhe transmeton videot".

Atëherë, në sa raste kryebashkiaku Erion Veliaj nuk ka qenë në zyrë, por ka qenë jashtë (me apo pa leje s'ka rëndësi) dhe në media transmetoheshin “live” inspektime në shkolla, në rindërtim, në punë publike? Janë me dhjetëra. Erion Veliaj është ekzemplari, meqenëse është dhe në detyrë, pavarësisht se është në burg.

Pastaj vijnë me radhë ministrat e Ramës. Ka edhe nga ata që nuk janë më në detyrë, ka edhe nga ata që janë në detyrë. Pastaj t'ia kalojmë po të dojë edhe te ministrat e tij me radhë, zëvendëskryeministra, ministrat e Brendshëm, të Infrastrukturës, Arsimit. Kë të dojë kryeministri ynë.

Zhvillojnë një, dy apo tri aktivitete në ditë, dhe e mbajnë, e futin në xhep një aktivitet apo tjetrin, dhe e japin kur nuk janë në Shqipëri. Kur kanë dhe aktivitete jashtë, se nuk është e thënë të jenë jashtë vetëm me pushime; mund të ikin edhe për agjenda zyrtare. Por i ruajnë ato dhe na japin sikur kanë bërë aktivitet në Tiranë apo në ndonjë rreth tjetër.

Ndaj kryeministri Rama e ka të kotë debatin me Fevziun. Pavarësisht se Blendi do t'ia nxjerrë emrat apo jo, do t'ia nxjerrë videot apo jo, është shumë e thjeshtë. Mjafton të merret sistemi TIMS dhe rrjetet sociale kur ministrat transmetojnë dhe aty i ka të gjitha në sa raste kanë ikur. Pastaj, u ka dhënë leje Rama të ikin jashtë dhe të transmetojnë këto video apo jo, kjo është një tezë tjetër. Fakti është që ministrat e qeverisë, kryetarë bashkish, publikojnë në rrjetet sociale dhe shpërndajnë për mediat aktivitete edhe gjatë ditëve kur ata nuk janë në Shqipëri apo nuk ndodhen në qytetin e caktuar. Pra, aktivitetin e kanë bërë në Vlorë, në Fier, në Korçë apo Shkodër, një ditë më parë apo dy ditë më parë dhe e transmetojnë më vonë.

Për më tepër, shembulli i këtyre transmetimeve më të vonshme të aktiviteteve është edhe vetë kryeministri. Kjo është një gjë normale që ndodh për shkak se ka shumë aktivitete dhe për të mos mbivendosur njëra-tjetrën, disa përpiqen të shmangen. Dhe vetë Rama ka aktivitete duke mos qenë fare në Shqipëri, transmetohet atë ditë ose më vonë. Kjo e koordinuar nga zyra e tij e propagandës.

Ndaj dhe ky është një debat që kryeministri e do për ta tjerrë, siç bën shpesh me mediat, por në fakt e ka të humbur pasi këtë gjë e bën edhe vetë. Dhe nuk ia ka fajin Blendi Fevziu, por ia ka qejfi i propagandës dhe rritjes së audiencës në rrjetet sociale për të cilën ka hapur dhe debatin me gazetarin./CNA





Lajmet e fundit nga