Ndarja nga jeta e gazetarit/ Kolegu tregon vitet e vështira pas ngjarjeve të '97-ës

5 Prill 2024, 14:35, Aktualitet CNA

Ndarja nga jeta e gazetarit/ Kolegu tregon vitet e vështira pas ngjarjeve

Zamir Dule

Gazetari Zamir Dule ka ndërruar jetë në moshën 55-vjeçare, pas një ndërhyrjeje kirurgjikale. Në lidhje me këtë lajm të trishtë ka reaguar edhe gazetari Muharrem Meko, i cili shprehet se ky është një lajm i kobshëm.

"Ndjeva keqardhje të thellë, për Heroin e shtypit Shqiptar, ish-kolegun, shokun e vëllait tim... Zamir Dule!
Lamtumirë i dashur vëlla! Banditi që të katandisi në atë gjendje në lulen e rinisë, e të mori jetën ty sot, mos paftë ditë të bardhë", shprehet Meko.

Dule humbi jetën pak pas mesnate në një spital privat, ku po kurohej për problemet kardiake. Lajmin e kanë konfirmuar familjarët e gazetarit, për të cilin do të zhvillohet sot ceremonia mortore në fshatin Miras të Korçës, ku është edhe vendlindja e tij.

Që prej vitit 1997, ai nuk ka qenë në gjendje të mirë shëndetësore, ndërsa ka jetuar në fshatin e tij në kushte jo të mira ekonomike. Prej disa kohësh gjendja e tij ishte rënduar. Pak ditë më parë, Unioni i Gazetarëve Shqiptarë bëri thirrje për ndihmë për gazetarin Zamir Dule.

Reagimi i plotë:

Lamtumirë kolegu im i dashur, "Heroi i Shtypit" të lirë... Zamir Dule!
...mos paftë ditë të bardhë ai banditi i "Ballkonit" që si i pafytyrë që është, vazhdon të lehë nga mëngjesi deri në mbrëmje për fjalën e lirë!
* * *
Miq... sapo më erdhi një lajm i kobshëm nga ish-kolegu im, Bardhi Gosnishti: - I dashur Muharrem ...Zamiri na la!
I miri, i dashuri, kolegu i talentuar, ish-gazetari i KJ, Zamir Dule, pas vuajtjeve të tmerrshme psikologjike që nga viti 1997 e deri më sot, ka ikur në amshim!
E rrëmbyen, e masakruan dhe e hodhën në një greminë në Malin me Gropa, bandat e SHIK-ut të kryebanditit Sali Berisha.
...ku e gjetën krejt rastësisht kalimtarë të rastit!
E qysh prej asaj ngjarjeje, ai u mbyll në shtëpinë e tij, në Miras të Devollit, ku s’pranonte të takonte e as të komunikonte me askënd!
...deri para dy javësh, kur Bardhi, i interesuar jashtëzakonisht, më tha: - Zamirin e shtruam në një spital këtu në Tiranë... por gjendja e tij është shumë e rëndë!
Ndjeva keqardhje të thellë, për Heroin e shtypit Shqiptar, ish-kolegun, shokun e vëllait tim... Zamir Dule!
Lamtumirë i dashur vëlla!
Banditi që të katandisi në atë gjendje në lulen e rinisë, e të mori jetën ty sot, mos paftë ditë të bardhë...!
Tani sapo më mori edhe ish-kolegu e miku ynë, Martin Leka. ...i ngashëryer e hidhëruar pa masë!
- Po lotoj në këto çaste për ty... sepse kujtoj vitet e vështira të gazetarëve të terrenit, siç ishim edhe ne të dy!
...kur të merrja në shtëpi e Lenca të shtronte të flije në një dhomë me djemtë... ishim paksa ngushtë me shtëpinë, vëlla!
- S'më erdhi aspak mirë kur ti ike në Tiranë... pranë redaksisë, por të urova suksese e bëra sikur u gëzova...
Me mua krimineli u mjaftua me burgun... por ty të mori jetën, vëlla! Qoftë i mallkuar ai që vuri dorë mbi ty!/CNA