web counter
LEXO PA REKLAMA!

SHKARKO APP

App Store
Google Play

E fundit!

x

Mjeku kirurg nën akuza për ngacmim seksual/ Avokatja: Rast i përsëritur ndër vite

13 Maj 2026, 11:39, Aktualitet CNA

Mjeku kirurg nën akuza për ngacmim seksual/ Avokatja: Rast i

Një 21-vjeçare ka denoncuar dy ditë më parë një mjek kirurg të spitalit të Korçës për ngacmim seksual, ndërsa avokatja e saj, Refxhei Tola, deklaron se ndaj të njëjtit person kanë mbërritur edhe denoncime të tjera që datojnë prej 33 vitesh.

Sipas saj, bëhet fjalë për raste të përsëritura abuzimi ndaj vajzave dhe grave, ndërsa rasti më i fundit është raportuar vetëm një vit më parë. Në një deklaratë publike, Tola tha se studioja ligjore që përfaqëson viktimën po trajton edhe kallëzime të tjera, të cilat pritet të depozitohen pranë organeve të drejtësisë.

Ajo ngriti shqetësimin se si një mjek i akuzuar për sjellje të tilla ka vijuar të ushtrojë profesionin për një periudhë kaq të gjatë në sistemin spitalor.

“Është një rast i përsëritur. Si ka mundur të integrohet dhe të qëndrojë për një kohë kaq të gjatë një mjek në sistemin spitalor, duke dhënë shërbime për individë të ndryshëm? Është një çështje shumë sensitive. Vlerësoj vajzën që denoncoi. Drejtësia duhet të reagojë që maniakët dhe abuzuesit të mos shkelin më mbi jetën e fëmijëve tanë.”

Avokatja deklaroi gjithashtu se deri tani nuk kanë marrë informacion nga prokuroria lidhur me dosjen hetimore, megjithëse janë autorizuar zyrtarisht për mbrojtjen e vajzës. Sipas saj, kërkesat për informacion janë dërguar zyrtarisht dhe pritet një përgjigje para se të jepet masa e sigurimit ndaj mjekut.

“Ne sot jemi autorizuar me prokurë për të qenë avokatët mbrojtës të vajzës dhe ende nuk kemi marrë informacionin e nevojshëm nga prokuroria. Megjithatë po i drejtojmë të gjitha kërkesat zyrtare me shkrim dhe me e-mail për të marrë informacionin para dhënies së masës së sigurimit.”

Sipas Tolës, po punohet për mbledhjen e provave që do të faktojnë se kemi të bëjmë me një rast të përsëritur dhe jo me një episod të izoluar. Ajo shtoi se përgjegjësia nuk qëndron vetëm tek mjeku i akuzuar, por edhe tek struktura spitalore, e cila sipas saj nuk ka ndërmarrë asnjë hetim administrativ.

“Ne duam të faktojmë që ky është një rast i përsëritur. Problemi nuk qëndron vetëm te mjeku, por edhe te struktura spitalore që nuk ka ndërmarrë hapa për ta larguar nga ai vend pune, edhe pse ka pasur indicie të mjaftueshme.”

Në përfundim, avokatja u bëri thirrje grave dhe vajzave që pretendojnë se janë abuzuar të denoncojnë rastet, duke garantuar anonimatin e plotë.

“Është koha për të folur. U bëj thirrje të gjitha grave dhe vajzave që janë ndier të abuzuara të denoncojnë. Ne garantojmë anonimatin e plotë. Ky fenomen ndodh rëndom dhe nuk mund të tolerohet më.”

Ndërkohë, mjeku kirurg i akuzuar për ngacmim seksual pritet të dalë ditën e nesërme para togave të zeza, ku në orën 13:00 do të njihet me masën e sigurisë që do të caktohet ndaj tij./ CNA





Lajmet e fundit nga