Mbyllet me sukses edicioni i 19-të/ Festa e Birrës në Korçë, 5 netë atmosfere unike

18 Gusht 2025, 14:58, Aktualitet CNA

Mbyllet me sukses edicioni i 19-të/ Festa e Birrës në

Festa e Birrës në Korçë ka mbyllur me sukses edicionin e 19-të, duke regjistruar pjesëmarrje rekord dhe duke e kthyer sërish qytetin në një nga destinacionet më të kërkuara të verës. Për pesë net me radhë, atmosfera festive ka mbajtur gjallë sheshin pranë terminalit, i cili u tejmbush deri në orët e para të mëngjesit.

Nata e fundit, një nga më të pëlqyerat nga vizitorët, solli performanca të artistëve të njohur si Fifi, Aurel Thellimi, Anxhela Peristeri dhe NRG Band, ndërsa publiku këndoi e festoi deri në orët e vona të natës.

Mbyllet me sukses edicioni i 19-të/ Festa e Birrës në

Veç vizitorëve nga i gjithë vendi, këtë vit festa tërhoqi edhe shumë turistë të huaj. Mes tyre, një grup amerikanësh që kishin ardhur posaçërisht për të shijuar festivalin. Përmes CNA, ata tregojnë entuziazmin e madh që ndiejnë në këtë event, duke u shprehur se e kishin planifikuar prej vitesh vizitën në Shqipëri, e më konkretisht në Korçë.

"Ne kemi ardhur nga Filadelfia. Jemi me pushime këtu dhe po e shijojmë festivalin. Është shumë qejf, po më pëlqen. Kemi marrë birra, ushqime dhe po kalojmë vërtet shumë këndshëm."

"Së pari, dua të them nga Amerika, 'GËZUAR'. Ku jam sot këtu? Është festival birre? Festival muzike? Festival ushqimi? Këtë nuk e di! Por kam udhëtuar në shumë vende të botës dhe erdha në Shqipëri për birra e për të bërë gëzuar. Kjo është arsyeja pse jam këtu. Unë nuk i njoh artistët, nuk i njoh birrat shqiptare, as ushqimin madje, por është një mrekulli! Është fantastike! Ndaj ju them 'Faleminderit, gëzuar.'"

"Ndihem super. Kemi dashur të vijmë në Shqipëri dhe e kemi menduar prej vitesh, dhe më në fund ia dolëm. Erdhëm dhe po ashtu donim të ishim edhe në këtë festival, pra jemi shumë të entuziazmuar që jemi këtu. Është e pabesueshme se sa njerëz janë mbledhur. Edhe pse nuk e njohim muzikën, është përsëri qejf që po e dëgjojmë."

"Është kënaqësi për mua që jam këtu. Kemi ardhur me miqtë tanë nga SHBA. Deri më tani jemi kënaqur me birrat, ushqimin, presim ta shijojmë mbrëmjen deri në fund. Atmosfera shumë e bukur, me shumë njerëz nga e gjithë bota."

Por festa nuk ishte vetëm për të huajt. Në Korçë janë rikthyer edhe familje emigrantësh, të cilët e konsiderojnë këtë event një traditë të dashur. Po ashtu edhe fëmijët janë kënaqur në këtë event.

"Po, vij gjithmonë me familjen time dhe kënaqem shumë. Më pëlqen atmosfera, këngëtarët, gjithçka. Ai që më ka pëlqyer më shumë dhe kam kënduar, është Alban Skënderaj. E falënderoj Bashkinë e Korçës që ka bërë këtë event kaq të bukur."

"Unë jam nga Korça, por jetoj në Itali. Kam ardhur me pushime. Më pëlqen shumë dhe shpresoj që Korça të vazhdojë kështu. Vij çdo vit në Festën e Birrës. Shumë mirë këtë vit, organizimi shumë i rregullt. Gëzuar."

Edicioni i 19-të i Festës së Birrës në Korçë dëshmoi edhe një herë se ky qytet jo vetëm ruan traditën dhe kulturën e tij, por di të ofrojë edhe një atmosferë unike që bashkon njerëz nga e gjithë bota. Për pesë net me radhë, muzika, birra, ushqimi dhe mikpritja korçare u bënë një arsye më shumë që qytetarë, turistë e emigrantë të rikthehen çdo vit në këtë ngjarje që tashmë ka marrë përmasa ndërkombëtare.

Mbyllet me sukses edicioni i 19-të/ Festa e Birrës në

Ky festival nuk është vetëm një festë, por një histori suksesi që rritet vit pas viti, duke forcuar imazhin e Korçës si kryeqendra e verës shqiptare dhe duke i dhënë qytetit një dimension të ri turistik e kulturor. Nga performancat e artistëve më të njohur, tek gotat e birrës që trokiten në çdo tavolinë, nga gëzimi i fëmijëve tek emocionet e emigrantëve të rikthyer në vendlindje, Festa e Birrës është kthyer në një pikë takimi, ku brezat dhe kulturat bashkohen në të njëjtin gëzim. Me këtë mbyllje madhështore, Korça jo vetëm që tregoi edhe një herë organizimin dhe energjinë e saj, por la pas kujtime të paharrueshme për mijëra vizitorë.

Dhe ndërsa sheshi pranë terminalit zbrazet nga dritat dhe muzika, qyteti mbetet me premtimin se vitin tjetër Festa e Birrës do të rikthehet edhe më e madhe, edhe më e bukur, duke e bërë Korçën një destinacion të pazëvendësueshëm të verës shqiptare./CNA