Masat e sigurisë për inceneratorin e Tiranës/ Gazetari: Vër mandate, hiq mandate, turp si rrodhi e gjitha

14 Korrik 2024, 09:25, Aktualitet CNA

Masat e sigurisë për inceneratorin e Tiranës/ Gazetari: Vër

Klodian Tomorri

Gazetari Klodian Tomorri shprehet në një postim në rrjetet sociale se nuk ka ndodhur as në ditët më të errëta të drejtësisë që zbatimi i ligjit të sabotohet në këto përmasa. Tomorri e ka fjalën për masat e sigurisë për inceneratorin e Tiranës.

Ai thekson se SPAK-u ka një muaj që tund masat, përfshirë urdhërarreste, por si përfundim u mbetën në dorë dhe tani nuk po gjejnë dot vendin ku t’i fusin.

"Nuk dihet kush dekonspiroi. Gjykata apo prokurorët, apo policia? Por kjo nuk ka shumë rëndësi. Se pisllëku më i madh i kësaj nuk është dekonspirimi. Dekonspirimi edhe mund të ndodhë në këtë vend. Turpi më i madh është mënyra se si rrodhi e gjitha. Vër mandate, hiq mandate. Lësho urdhërarreste, hiq urdhërarreste. Vër emra, hiq emra. Vërja Lenës, hiqja Prenës. Në fund, përfunduan te Denisi dhe Denisa. Tani ka mbetur vetëm të gjejnë ndonjë si Aleks Xinxa dhe të thonë ky është koka", shprehet ai.

Reagimi i plotë:

Ajo që ka ndodhur këto dy javët e fundit me aksionin e paralajmëruar gjysmëzyrtarisht, pastaj të përgënjeshtruar zyrtarisht, pastaj të vërtetuar po zyrtarisht, të masave për inceneratorin e Tiranës është as më shumë dhe as më pak, rënia e shtetit ligjor. Me b*thë mbrapsht madje.

Mekanizmi që u krijua me shumë mundim për të pastruar kalbëzimin masiv të shtetit, pra Reforma në Drejtësi, sot u ekspozua si vatër qendrore e këtij kalbëzimi.

Nuk ka ndodhur kurrë në Shqipëri, as në ditët më të errëta të drejtësisë së pavetingosur dhe të korruptuar, që zbatimi i ligjit të sabotohet në këto përmasa. Ose të paktën kur ka ndodhur, ka ndodhur publikisht, që është shumë më e ndershme se kjo tani.

Kanë një muaj që tundin masa, përfshirë urdhërarreste. Por si përfundim u mbetën në dorë dhe tani nuk po gjejnë dot vendin ku t’i fusin. Nuk është se ka shumë alternativa këtu xhanëm, po nejse.

Nuk dihet kush dekonspiroi. Gjykata apo prokurorët, apo policia? Por kjo nuk ka shumë rëndësi. Se pisllëku më i madh i kësaj nuk është dekonspirimi. Dekonspirimi edhe mund të ndodhë në këtë vend.

Turpi më i madh është mënyra se si rrodhi e gjitha. Vër mandate, hiq mandate. Lësho urdhërarreste, hiq urdhërarreste. Vër emra, hiq emra. Vërja Lenës, hiqja Prenës.

Në fund, përfunduan te Denisi dhe Denisa. Tani ka mbetur vetëm të gjejnë ndonjë si Aleks Xinxa dhe të thonë ky është koka./CNA