Lojërat e fatit dhe zhdukja e Ervis Martinajt/ Flet Rama: Ku qëndron problemi i policisë

22 Shtator 2022, 22:40, Aktualitet CNA

Lojërat e fatit dhe zhdukja e Ervis Martinajt/ Flet Rama: Ku qëndron

Kryeministri Edi Rama dhe Ervis Martinaj

Kryeministri Edi Rama, sonte në “Opinion”, ka folur sërish për të shumëkërkuarin e Drejtësisë, Ervis Martinaj.

Rama tha se policia duhet të dalë së shpejti me një version zyrtar.

Kryeministri shtoi se policia ka më tepër informacione se çfarë kanë të tjerët, por duhet të ketë qartësi kur bën një komunikim zyrtar dhe të bazuar në fakt.

Ndër të tjera, Rama shtoi se është i informuar nga policia e shtetit, por problemi është sipas kryeministrit që policia duhet të ketë version të bazuar në prova.

“Është e papranueshme që vendi të jetojë me një 'Big Brother' të kronikës së zezë dhe me median që ushqen këtë telenovelë në pamundësi për të pasur versionin zyrtar. Së shpejti policia duhet të dalë me versionin zyrtar, ndryshe nga spekulantët… policia nuk duhet të ketë thjeshtë informacione, por duhet të bazohet në prova. Unë jam vazhdimisht i informuar nga policia e shtetit, problemi është që policia duhet të ketë version të bazuar në prova. Policia ka shumë më tepër sesa ç’kanë të tjerët, por duhet të ketë qartësi kur bën një komunikim zyrtar dhe të bazuar në fakt”, tha Rama.

I pyetur nga gazetari Blendi Fevziu nëse rikthimi i diskutimit për bastet online ka të bëjë me zhdukjen e “mbretit të lojërave të fatit” Ervis Martinaj, Kryeministri Edi Rama mohoi këtë pretendim.

“Kjo është haluçinante dhe kriminale. Sepse çështja e lojërave të fatit është shumë e qartë, s’ka lidhje me asnjë teori konspiracioni. Ne nuk flasim për rikthim të lojërave të fatit se nuk ka shans sa të jem unë në këtë detyrë që të rikthehen lojërat e fatit. Nuk do të ketë hapje të qendrave të lojërave të fatit. Kemi një problem të vetëm që ka të bëjë me bastet sportive online që janë problem që e ka gjithë planeti. Nuk ka lidhje fare sepse debati për këtë çështje është hapur nga Komiteti Olimpik Shqiptar, nga FSHF, kohë përpara. Të akuzosh qeverinë e vendit se angazhohet në iniciativa të tilla është kriminale. Bastet online janë të pakontrollueshme”, theksoi kryeministri./ CNA.al