Kthimi i emigrantëve në atdhe/ Aplikimet për dokumente biometrike, të hapura edhe të shtunën

11 Gusht 2023, 16:26, Aktualitet CNA

Kthimi i emigrantëve në atdhe/ Aplikimet për dokumente

Zyrat e aplikimit “Identitek” për dokumente biometrike do të jenë të hapura edhe këtë të shtunë të 12 gushtit.

Lajmin e bën të ditur Ministria e Brendshme, e cila deklaron se hapja e zyrave edhe të shtunën do të lehtësojë shërbimin për emigrantët e rikthyer në atdhe, që duan të ripajisen me dokumente udhëtimi.

Ministria e Brendshme shpjegon hapat që qytetarët duhet të ndjekin për t’u pajisur me dokumentacionin biometrik. Konkretisht, qytetarët duhet të blejnë kuponin pranë zyrave postare.

Ata që nxjerrin mjet identifikimi për herë të parë duhet të bëjnë aplikimin për formularin e Policisë së Shtetit nëpërmjet e-albania, ndërsa ata që kërkojnë rinovim nuk kanë nevojë për formularin, por mund të paraqiten vetëm me kupton në zyrat e “IdentiTek”.

“Ministria e Brendshme dhe kompania “IdentiTek” njofton qytetarët se të gjitha zyrat e aplikimit për ID karta dhe pasaporta biometrike do të jenë të hapura edhe ditën e shtunë, datë 12 gusht.

Kjo për të lehtësuar shërbimin për qytetarët tanë, që vijnë për të pushuar gjatë verës në atdhe, e njëkohësisht ripajisen me dokumente udhëtimi.

Procedura për aplikim për pasaportë biometrike ju merr vetëm pak minuta kohë, në zyrën e “IdentiTek”, që ndodhet në zonën ku banoni. Së pari, blini një kupon tek çdo zyrë e Postës Shqiptare. Nëse aplikoni për herë të parë plotësoni në e-Albania formularin e Policisë së Shtetit. Nëse dokumenti është rinovim, ky formular nuk është i nevojshëm.

Aplikimin për ID kartë e bëni në zyrën ku jeni banor, duke u paraqitur me një kupon të blerë në zyrën e Postës Shqiptare. Riaplikimi për ID kartë mund të bëhet në çdo zyrë, pavarësisht vendbanimit. E gjithë procedura merr pak minuta.

MB dhe “IdentiTek” fton qytetarët që u ka përfunduar afati i vlefshmërisë së kartave të identitetit, të kryejnë sa më parë procedurat për rinovimin e saj. Përmes ID kartës përfitohen shërbime online, por edhe mundësia për të udhëtuar në vendet e rajonit me të cilat kemi marrëveshje”, thuhet në njoftim./ CNA