Klodian Tomorri akuzon Ministrinë e Financave: Po fsheh listën e përfituesve të faljes së taksave

3 Dhjetor 2025, 21:12, Aktualitet CNA

Klodian Tomorri akuzon Ministrinë e Financave: Po fsheh listën e

Gazetari Klodian Tomorri ka reaguar ashpër pas debatit në Komisionin Parlamentar të Ekonomisë, ku deputetët e Partisë Demokratike propozuan një amendament që detyronte qeverinë të publikonte listën e subjekteve që përfitojnë më shumë se 50 mijë euro falje taksash në kuadër të ligjit të amnistisë fiskale.

Sipas Tomorrit, zëvendësministri i Financave kundërshtoi publikimin e listës duke argumentuar se bëhet fjalë për “të dhëna sensitive”. Por këtë qëndrim gazetari e cilëson absurd dhe të motivuar nga interesa të fshehta.

Ai thekson se qeveria publikon çdo transaksion të thesarit, përfshirë shumën, përfituesin dhe arsyen e pagesës, ndërsa në rastin e faljes së detyrimeve tatimore refuzon transparencën.

Tomorri akuzon se arsyeja e vërtetë e mosbërjes publike të listës lidhet me faktin se përfitojnë persona të lidhur me qeverinë.

Gazetari shton se përdorimi i justifikimeve si “të dhëna sensitive” dhe “konfidencialitet” është një skemë e përsëritur sipas tij, që është përdorur edhe më parë në raste të tjera, nga menaxhimi i të dhënave gjatë pandemisë deri te projektet në sektorin e mbrojtjes dhe teknologjisë së informacionit.

"Deputetët e Partisë Demokratike propozuan sot në Komisionin Parlamentar të Ekonomisë një amendament brenda ligjit të faljes, i cili detyronte qeverinë të bënte publike listën e atyre që përfitojnë më shumë se 50 mijë euro falje taksash.

E dini si u pergjigj zëvendësministri i Financave? Nuk mund ta bëjmë publike se janë të dhëna sensitive.

Këta nuk kanë as turp të bëhen budallenj. Madje e bëjnë këtë punë me qejf të madh. Ça sensitiviteti ka këtu?

Këtyre po u falet vjedhja, po u falen paratë e qytetarëve, paratë e të sëmurëve, paratë e fermerëve, paratë e pensionistëve, ministria e Financave thotë është e dhënë sensitive.

Ne publikojmë çdo transaksion thesari; publikojmë shumën, publikojmë përfituesin, publikojmë motivin pse bëhet pagesa. Por lista e përfituesve nga falja e taksave qenka e dhënë sensitive.

Ça është kjo tani? Ore falni paratë tuaja po të doni dhe mos ja tregoni gruas, vëllait, babait, quheni sensitive, quajeni ça të doni. Por këtu nuk po falni paratë e shtëpive tuaja, që e fshihni.

Tani, e dini pse nuk e publikojnë listën e përfituesve të mëdhenj këta? Është shumë e thjeshtë. Sepse ata janë porositësit e ligjit. Po të dalë lista, do dalë edhe arsyeja se përse dhe për kë po bëhet falja. Kaq e thjeshtë është.

Ky është korrupsion. Sa herë që ka korrupsion del gjithmonë kjo historia e të dhënave sensitive, konfidencialiteti, mbrojtja e privatësisë etj etj. Kështu u bë me Covidin, kjo punë u bë tek IT-ja, kjo punë po bëhet andej nga mbrojtja. Dhe këto janë të gjitha korrupsion", shkruan Tomorri./ CNA