Karakaçi në konferencën e FIAA/ Sektori energjetik, më i ndjeshmi në zhvillimet gjeopolitike

27 Mars 2026, 14:24, Aktualitet CNA

Karakaçi në konferencën e FIAA/ Sektori energjetik, më i

Ministri i Energjisë dhe Infrastrukturës, Enea Karakaçi, këtë të premte ishte i pranishëm në Konferencën e Shoqatës së Investitorëve të huaj në Shqipëri. Në fjalën e tij ministri vuri theksin në sektorin energjetik, që sipas tij është ndër sektorët më të ndjeshëm në zhvillimet gjeopolitike. Më tej Karakaçi u shpreh se përmes reformave të thella Shqipëria ka ndërtuar një sistem të qëndrueshëm dhe të harmonizuar me Bashkimin Europian.

“Sektori energjetik është ndër sektorët më të ndjeshëm në zhvillimet gjeopolitike.

Çfarë ka bërë Shqipëria gjatë këtyre viteve?! Patjetër përmes reformave të thella kemi ndërtuar një sistem të qëndrueshëm, të rregulluar dhe të harmonizuar me Bashkimin Europian. Kjo nuk vjen vetëm si nevojë e Shqipërisë për të qenë anëtare e Bashkimit Europian dhe si e tillë për të përafruar gjithë kuadrin ligjor rregullator me Bashkimin Europian, por vjen edhe si domosdoshmëri për të thithur investime, për t'u garantuar investitorëve një kuadër të qëndrueshëm rregullator.

Kemi forcuar institucionet, kemi modernizuar prodhimin dhe kemi investuar në digjitalizimin dhe inovacionin e tyre. Por, mbi të gjitha e dëshmon edhe ky event i tillë, kemi ndërtuar një partneritet real me sektorin energjetik. Kontributi i investitorëve vendas që janë shumë të rëndësishëm, por edhe të huaj, ka qenë vendimtar në këtë transformim. Pa këtë bashkëpunim do ishte e pamundur të arrinim progresin e sotëm.”

Më tej ministri foli për kapacitetet prodhuese, për të cilat tha se janë marrë hapa konkretë.

“Ndërkohë kemi pasur rezultate shumë konkrete për sa i përket rritjes së kapaciteteve prodhuese. Këtu kemi një masë mbështetëse shumë të mirë që ka lejuar dhe krijuar mundësinë që të kemi rreth 400 megakapacitete vetëprodhuese në vend, pikërisht për shkak të masave dhe kuadrit rregullator shumë transparent dhe të thjeshtuar që u ka krijuar mundësinë bizneseve të vogla apo familjarëve që të kenë mundësitë për të pasur kapacitete gjeneruese për vetëprodhim. Janë marrë hapa konkretë ndërkohë për uljen e humbjeve, rritjen e arkëtimeve, krijimin e kompanive të sektorit energjetik që të jenë në një qëndrueshmëri financiare, të mos jemi të varur, le të themi, nga ndërhyrjet shtetërore për sa u përket financimeve.

Por, të jemi edhe konkretë, për të vijuar dhe për të pasur këtë qëndrueshmëri është nevoja që të kemi edhe investime në burime njerëzore. Patjetër burimet njerëzore janë çelësi i sektorit energjetik dhe ne edhe këtu po marrim hapa konkretë”, tha Karakaçi.

Në mbyllje Karakaçi u shpreh se ministria ka në plan që në tremujorin e tretë të vitit 2026 të hap një ankand të ri për prodhimin gjenerues të rinovueshme. Ky plan sipas ministrit do të mbështetet në asistencën dhe në bashkëpunim me BERZH./ CNA