Justifikimet e Lefter Kokës në GJKKO/ Kryemadhin e quan fallxhore

6 Shtator 2023, 14:52, Aktualitet CNA

Ish-ministri i Mjedisit, Lefter Koka, ka dalë sot para Gjykatës së Posaçme të Shkallës së Parë për Korrupsionin dhe Krimin e Organizuar ku është justifikuar për akuzat e bëra ndaj tij për çështjen e inceneratorëve.

Përmes avokatit, Lefter Koka pretendoi se nuk ka kryer asnjë shkelje ligjore.

Ai u shpreh se pagesat për inceneratorin e Fierit nisën në vitin 2018, ndërsa ai u largua në 2017 nga detyra.

Ai u shpreh se akuza bazohet në mendime të fallxhores (Monika Kryemadhit) dhe jo në prova.

Sipas tij provat janë të sajuara.

"Më arrestuan e më pas sajuan prova të turpshme. Të besosh te (Meta, Kryemadhi) njësoj si të investosh te Sudja në ditët e falimentit. Dikush në burg më tha që u arrestua për evazion, i thashë mirë që s’të njeh Monika se do të ishe me mua."

Argumentet e mbrojtjes së Lefter Kokës:

1-Një dosje hetimore e fraksionuar në copa me qëllim moszbardhjen e së vërtetës dhe përgjegjësive të secilit.

2. Akuza është kopje e ekzaktë e akuzës së procesit të Elbasanit me të njëjtit persona, të njëjtat shoqëri dhe të njëjtat fakte penale, madje dhe pretenca është e njëjtë.

3-Kostoja e impiantit të Fierit ka tejkaluar vlerën që shteti ka paguar dhe koncesionari ka pësuar humbje të rënda.

4-Administratori i përcaktuar nga shteti ka faktuar se koncesionari ka paguar 5,2 milionë euro punime shtesë, pa marrë asnjë fond nga buxheti i shtetit si dhe ka pësuar një dëm prej 3 milionë eurosh.

5. Hetimi shmangu dhe pengoi të vërtetën për këtë impiant duke mos kryer një akt ekspertimi inxhinierik pasi e kuptoi që do të dështonte në akuza në rast se do ta kishte bërë një të tillë.

6.Procedura është konform ligjit e filtruar edhe nga anëtarët e institucioneve që kishin detyrë me ligj ta filtronin dhe monitoronin ligjërisht.

7- Çështja mbi shpronësimin e tokës është gjykuar me vendim të formës së prerë nga Gjykata Administrative, e cila e ka cilësuar “Truall” pronën e shpronësuar, ndërsa Ministria e Mjedisit e shpronësuar me vlerë “Tokë Are” me një vlerë 6-fish më pak.

8-Punimet kanë filluar për përgatitjen e kantierit që në vitin 2017, sipas lejes provizore të bashkisë, faktuar kjo edhe nga Vendimi i Gjyqtares Paraprake të çështjes.

9-Askush nga personat e pyetur deri më sot nuk dëshmon të jetë influencuar apo t’i ketë dhënë para korrupsioni Lefter Kokës.

10-Nuk rezulton asnjë njohje e Lefter Kokës me koncesionarët.

11-Hetimi dhe akuza bazohen vetëm në disa fatura shoqërish pa analizuar dhe provuar se si kanë shkuar këto lekë te Lefter Koka.

12-Për çdo paragraf të akuzës kemi paraqitur me qindra dokumente dhe argumente që katërcipërisht vërtetojnë të kundërtën?

13-Lefter Koka nuk ka asnjë pasuri të shtuar pas 2013, faktuar nga hetimi dhe ILDKPKI. Ku janë paratë e korrupsionit dhe si janë pastruar?

14-Prona që kërkoni të sekuestroni ka një vlerë 4-fish më të lartë se vlera e korrupsionit të pretenduar.

15-Asnjë qindarkë e pajustifikuar nuk është gjetur në pasurinë e Lefter Kokës. Asnjë cent nuk është kapur si provë e korrupsionit.

16-Akuzat pa prova forcojnë bindjen se Lefter Koka sulmohet politikisht dhe me porosi./ CNA