Humbi jetën duke shpëtuar dy turistë/ Homazhe në nder të kapitenit Arben Anamali

11 Korrik 2025, 14:07, Aktualitet CNA

Humbi jetën duke shpëtuar dy turistë/ Homazhe në nder

Këtë të premte po zhvillohen homazhe në nderim të kapitenit Arben Anamali, i cili humbi jetën në ujërat e liqenit të Shkodrës teksa po shpëtonte dy turistë.

Institucionet vendore u shprehën ngushëllime familjarëve teksa vunë theksin tek akti heroik që Arbeni kreu për të shpëtuar jetën e të tjerëve.

"Erdhem për t'i shprehur ngushëllimet familjes Anamali, për aktin heroik të Arbenit. Për t'i shprehur të gjithë mbështetjen familjes, për të shprehur solidaritetin në këtë ditë të vështirë, por gjithashtu jemi edhe krenarë për aktin sublim të tij. Është shumë e dhimbshme për moshën e tij, fjalët janë të tepërta", tha Majlinda Angoni, Prefekte e Qarkut Shkodër.

"Në një ditë të vështirë si kjo e sotmja jemi në emer të bashkisë për t'i shprehur ngushëllimet familjes Anamali për humbjen e birit të tyre, i cili dha jetën në mënyrë heroike për të shpëtuar 2 turistë në liqenin e Shkodrës. Arbeni do të mbetet i paharruar për ne, jo vetëm për aktin heroik, por edhe për njeriun që ishte. Ai u shpall hero i kombit, ndaj edhe nderimi për të do të jetë brez pas brezi. Ngushëllime familjes", u shpreh Teuta Qyteza, zëvendëskryetarja e Bashkisë Shkodër.

Mes lotësh bashkëshortja e të ndjerit dhe nipi i tij tregojnë për momentet kur mësuan lajmin e rëndë.

"Është një dhimbje e madhe për të gjithë familjen tonë, për nanen, mua, për fëmijët. Për të gjithë që e kanë njohur sepse ka qenë njeri shumë i mirë dhe i përkushtuar. Dha jetën e vet për turistët. Një kolege e tij më mori në telefon e më tha që po nisi dikë të të marrë sepse Arbeni ka pësuar një aksident në liqen e mendova që aksident të lehtë, por nuk e mendova kurrë që është mbytur sepse ka qenë shumë i fortë fizikisht, notar i mirë”, tha Najada Anamali, bashkëshortja e Arben Anamalit.

"Nderimet kanë qenë të merituara, uroj të mos harrohet më vonë, por të vijojë të nderohet siç e meriton. Gjesti i tij ishte burrni, nuk kam ça shtoj më", u shpreh Mirsad Isufi, nipi i Arben Anamalit.

Arben Anamali ishte kapiten në anijen, e cila shërbente për shëtitjen e turistëve në liqenin e Shkodrës. Ai hyri në liqen për të shpëtuar 2 turistë që po mbyteshin, por fatkeqësisht nuk mundi të dilte i gjallë. Pas 48 orësh kërkime ai u gjet nga polumbarët. Mes nderimesh, dëshmori i atdheut, Arben Anamali, u përcoll për në banesën e fundit./ CNA