E fundit!

19:55 Aktualitet

“Protestat e kanë goditur qeverinë”/ Kikia: Ministrat dhe deputetët nuk ecin të lirë në rrugë

Gazetari dhe analisti Mentor Kikia ka folur ditën e sotme ...

Hetimet për krimet zgjedhore/ SPAK jep detaje për qytetarët

22 Prill 2025, 15:53, Aktualitet CNA

SPAK

SPAK ka dhënë detaje për qytetarët në lidhje me kompetencat dhe mënyrën se si do të hetohen krimet zgjedhore.

Prokuroria e Posaçme sqaron se veprat penale të lidhura me procesin zgjedhor janë të shumta dhe të parashikuara qartë në Kodin Penal dhe përfshijnë:

-pengimin e subjekteve zgjedhore

-falsifikimin apo dëmtimin e materialeve zgjedhore

-shkeljen e fshehtësisë së votimit

-votimin më shumë se një herë ose pa u identifikuar

-korrupsionin aktiv dhe pasiv në zgjedhje

-përdorimin e funksionit publik për qëllime politike

-kanosjen apo dhunën ndaj pjesëmarrësve në zgjedhje

-pengimin e zgjedhësit

-braktisjen e detyrës nga anëtarët e komisioneve

-shkeljen e së drejtës së zgjedhjes

-përdorimin e paligjshëm të dokumenteve të identifikimit

-shpërdorimin e autoritetit ushtarak apo policor.

Prokuroria e Posaçme ka kompetencat për të hetuar krimet zgjedhore kur përfshihen korrupsioni aktiv dhe pasiv.

Në rastin e korrupsionit aktiv, bëhet fjalë për dhënien e të hollave, pasurive apo favoreve të tjera për qytetarë apo persona të lidhur me ta, me qëllim ndikimin në procesin zgjedhor, siç është:

-mbledhja e firmave

-votimi në një mënyrë të caktuar

-pjesëmarrja apo jo në votime

-mbështetja për një kandidat apo subjekt politik.

Ndërsa në korrupsionin pasiv, bëhet fjalë për raste kur qytetarët pranojnë apo kërkojnë përfitime materiale në këmbim të mbështetjes zgjedhore. Të dyja këto vepra parashikojnë dënim me burgim nga 1 deri në 5 vjet.

SPAK shkon më tej nëse këto krime kryhen nga zyrtarë të lartë publikë, nga organizata kriminale, grupe të strukturuara kriminale, banda të armatosura apo organizata terroriste.

SPAK mund të hetojë për krime zgjedhore edhe Presidentin e Republikës, kryetarin e Kuvendit, Kryeministrin, ministrat dhe zëvendësministrat, deputetët, kryetarët e bashkive, gjyqtarët e Gjykatës Kushtetuese dhe të Lartë, Prokurorin e Përgjithshëm, Inspektorin e Lartë të Drejtësisë, anëtarët e KLGJ dhe KLP, si dhe drejtues të institucioneve shtetërore qendrore apo të pavarura.

Qytetarët që dëshirojnë të denoncojnë një krim zgjedhor mund ta bëjnë këtë përmes tri mënyrave:

-me kallëzim penal,

-me shkrim të dorëzuar në SPAK apo përmes postës,

-me kallëzim me gojë pranë policisë gjyqësore në vendin ku është kryer vepra,

-përmes platformës së dedikuar në faqen zyrtare të SPAK-ut, ku garantohet anonimiteti dhe ofrohet mundësia për të ngarkuar dokumente apo materiale audio/vizive./ CNA