“Fjala korrupsion si këpucët e modës”/ Rama: Kompanitë serioze nuk kanë shprehur rezerva për sektorin e energjisë

12 Janar 2026, 10:56, Aktualitet CNA

“Fjala korrupsion si këpucët e modës”/ Rama:

Kryeministri Edi Rama tha sot se sektori energjetik shqiptar ka kaluar nga plagët e së shkuarës në një fazë të stabilizuar dhe transparente, ku konkurrenca ndërkombëtare funksionon pa shqetësime për korrupsion.

Ai theksoi se portofoli energjetik po diversifikohet: uji mbetet burimi kryesor i prodhimit, ndërsa energjia diellore dhe e erës po zënë gjithnjë e më shumë vendin e tyre. Për 30% të prodhimit, Shqipëria do të jetë vetëmjaftuese dhe çdo energji e tepërt do të eksportohet, duke sjellë të ardhura për vendin.

Rama nënvizoi se garat për investime në sektor janë të hapura dhe të ndershme, pa ankesa nga kompanitë pjesëmarrëse, dhe qeveria ka ofruar mbështetje për të kapërcyer çdo pengesë burokratike. Ai vlerësoi zhvillimin e sektorit si një shembull të administrimit modern dhe të garës së hapur për investime.

“Sot ato që deri dje ishin plagë në shtetin shqiptar janë pararojë në administrimin dhe në mirëfunksionimin e tyre. Sot ne kemi një portofol që ka nisur të diversifikohet, të balancohet ku uji do të mbetet burimi kryesor i prodhimit, por energjia e diellit dhe erës kanë filluar të zënë vendin e tyre.

Për këtë 30% ne do kemi të garantuar se sistemi ynë do të jetë i vetëmjaftueshëm, çdo gjë që do të prodhojmë do ta eksportojmë, që do të thotë jo më para të dala jashtë vendit, por energji e shitur jashtë për të sjellë para brenda vendit.

Sektori energjetik është sektori i garave të hapura ndërkombëtare dhe prania masive e kompanive pjesëmarrëse në këto gara.

Jemi në një fazë ku fjala korrupsion është si ato këpucët e modës që po nuk e nxori njeri nga goja duket se nuk është në modë, nga ky sektor ka marrë përgjigjen të vazhdueshme dhe nuk ka një kompani serioze që ka marrë pjesë në garë që të ketë shprehur një rezervë sado të vogël lidhur me integritetin e garave dhe proceset e stabilizuara në këtë sektor.

Jo vetëm që nuk kanë ndeshur në Tiranë asnjë pengesë të kësaj natyre, e kanë pasur qeverinë në krah për të kapërcyer pengesat burokratike absurde”, tha Rama./ CNA