Favorizuan ndërtuesit në të paktën 20 raste, Prokuroria Korçë dërgon në gjyq dy zyrtarët e bashkisë

30 Qershor 2025, 14:35, Aktualitet CNA

Favorizuan ndërtuesit në të paktën 20 raste, Prokuroria

Prokuroria pranë Gjykatës së Shkallës së Parë të Juridiksionit të Përgjithshëm Korçë përfundoi hetimet dhe dërgon në gjyq shtetasit Zh. B. dhe E.Gj. për kryerjen e veprës penale “Shpërdorim i detyrës” parashikuar nga neni 248 i Kodit Penal.

Nga hetimet mbi procedimin penal nr.1061, të vitit 2022, rezultoi se këta shtetas me detyrë Drejtoreshë e Drejtorisë së Urbanistikës dhe Përgjegjës i Sektorit të Kontrollit dhe Zhvillimit të Territorit në Bashkinë Korçë, të cilët për shumë vite kanë ushtruar detyrën si inxhinierë pranë Zyrës së Urbanistikës në Bashkinë Korçë dhe kanë pasur detyrë të kontrollojnë aplikimet e bëra nga qytetaret apo bizneset për pajisjen me leje për kryerjen e ndërtimeve të reja apo punimeve të tjera ndërtimore, vlerësimin e dokumentacionit, miratimin e lejes, etj., kanë aplikuar taksë në shkallë me të ulët në 18 raste nga 8%, në 3% dhe 2 raste nga 4% në 3%.

Në rastin objekt hetimi, për ndërtimin e një kompleksi me 4 pallate në lagjen nr.3 të qytetit të Korçës, dy drejtuesit e Urbanistikës së Bashkisë Korçë, kanë miratuar lejen e ndërtimit për shfrytëzim si kompleks turistik dhe subjekti ka paguar taksën 3% për ndikimin në infrastrukturë për ndërtimet e reja, në një kohë kur taksa për ndikimin në infrastrukturë për ndërtimet e reja me qëllim banimi, apo njësi tregtarë shërbimi, për zonën ansambël arkitektonik tradicional në qytetin e Korçës, është përcaktuar 8% e çmimit të shitjes për metër katror. Subjekti nuk u është përmbajtur kushteve të lejes së ndërtimit, ka paguar 3% taksës ndikim në infrastrukturë, kur duhej të paguante 8%, një shmangie prej 36000 eurosh në vlerë monetare nga Taksa e ndikimit në infrastrukturë vetëm nga ky subjekt. Shmangia e taksës nga 8% në 3%, është bërë me miratim të drejtuesve të Zyrës së Urbanistikës Bashkia Korçë.

Nga sa më sipër rezulton se me veprimet e tij shtetasit E.Gj. dhe Zh. L. i kanë konsumuar elementet e veprës penale “Shpërdorimi i detyrës”, parashikuar nga neni 248 i Kodit Penal dhe duhet të mbajnë përgjegjësi penale.

Ata favorizuan subjektet ndërtuese në 18 raste, ku taska 8% për ndërtim me qëllim shitje është reduktuar padrejtësisht në 3% ose 4% dhe në dy raste nga 4% në 3%, duke shkaktuar dëm ekonomik për Bashkinë Korçë. Si dhe kanë miratuar vërtetime për pajisjen me certifikatë përdorimi, duke fshehur qëllimin tregtar të ndërtimit edhe kur ishte e qartë se ishin shitur apartamente. Po kështu, shtetasi E.Gj. ka firmosur raporte me përmbajtje të pavërtetë, nuk ka respektuar kompentencat për kontrollin e ndërtimit dhe kanë shkaktuar dëm ekonomik për Bashkinë Korçë./ CNA