Çështja e Butrintit/ Deputetja e PD-së: Shteti po ia dorëzon një individi që e quan tokë greke

20 Tetor 2023, 11:01, Aktualitet CNA

Çështja e Butrintit/ Deputetja e PD-së: Shteti po ia

Deputetja e PD, Ina Zhupa

Deputetja e PD, Ina Zhupa, në një deklaratë për mediat ka hedhur akuza se qeveria po i jep të drejtën e vendimmarjes për Butrintin, Richard Hodges, pjesëtar i bordit të fondacionit për Butrintin i cili në botimet e tij ka një qëndrim antishqiptar.

Zhupa thekson se shteti nuk mund t’i dorëzojë pasurinë e tij një individi që deklaron se Butrinti është grek dhe Saranda është tokë greke.

Deputetja e PD-së, nënvizon se Richard Hodges me deklaratat e tij minon historinë tonë dhe nuk mund të jetë vendimmarrës në bordin drejtues të fondacionit për Butrintin.

“Të gjitha këto pyetje lidhen drejtpërdrejtë me anëtarët e bordit të Fondacionit të Butrintit që do të vendosë se si kjo pasuri e jona do të përdoret ne 10 vitet e ardhshme.

Sepse pjese e këtij Bordi është dhe Richard Hodges, pjesëmarrja e të cilit në bord, referuar qëndrimeve të tij publike paraqet implikime të nivelit kushtetues të vënies në rrezik të cenimit të identitetit dhe trashëgimisë sonë kombëtare.

Këto lidhen drejtpërdrejtë me një nga arsyet pse jemi në Gjykatë Kushtetuese.

Sepse, individë privatë zotërojnë shumicën e përfaqësimit në Bord, para shtetit për të pasur kontrollin mbi Butrintit.

Butrinti është një qytet antik që nuk është zbuluar plotësisht. Kërkimet dhe interpretimet e gjetjeve aty lidhen drejtpërdrejtë me identitetin, trashëgiminë dhe historinë e vendit tonë.

Richard Hodges është një studiues anglez që ka tezën që e shfaq në leksionet e tij publike dhe në librat e tij se Butrinti është Grek, se Saranda është greke dhe jugu i vendit i janë dhënë padrejtësisht Shqipërisë, si një vendim politik në 1913.

Referuar kësaj qasje të tij, si mundet që shteti shqiptar t’ia dorezojë pasurinë e tij, pjesë të pasurisë botëror në dorë këtij personi???!!!!

Cenimi kushtetutës, ndodh sepse deklarimet dhe qëndrimet e tij të cilat bien ndesh me nenin 3 të Kushtetutës dhe gjithashtu bien ndesh me të dhënat dhe qëndrimin zyrtar të shtetit shqiptar deri më tani, që hedhin poshtë qëndrimet e tij antishqiptare.

Me deklaratat e tij, ai minon historinë, identitetin tonë dhe në këtë mënyre ai s’mund të jetë kurrë vendimmarrës ne Bordin Drejtues të Fondacionit për administrimin e Butrintit.

Hodges, por dhe të tjerë që mund ti zgjedhin nesër po këta privat, me kompetencat që ka në bordin e drejtorëve të fondacionit, përpiqen të interpretojnë çdo gjetje sipas shkollës apo prirjeve të tyre, që duken qartë se nuk përkojnë me realitetin, ato duken qe janë antishqiptare, që deformojmë realitetin, që keqpërdorin pushtetin dhe duan qe të rishkruajnë historinë e shqiptarëve", tha Zhupa./ CNA