Dosja "Partizani"/ Zbardhet dëshmia e ish-drejtoreshës së Sporteve: Disa prona nuk ishin të regjistruara

8 Qershor 2026, 12:18, Aktualitet CNA

Seanca gjyqësore në ngarkim të ish-kryeministrit Sali Berisha dhe të pandehurve të tjerë të dosjes “Partizani” ka nisur në GJKKO.

Ish-drejtoresha e Sporteve, Violeta Shqevi, është thirrur në seancë për të dhënë dëshminë e saj.

Shqevi ka pranuar se ka qenë e punësuar si juriste në Ministrinë e Turizmit në 2007 dhe më pas ka qenë në rolin e kryetares për strategjinë e sportit për vitet 2008-2020.

Shqevi ka dëshmuar se në vitin 2005 ishte miratuar një objektiv 2-vjeçar për modernizimin e klubeve sportive që ishte nën përgjegjësinë e Ministrisë së Sporteve.

E pyetur se ku ndodhej godina, Shqevi ka treguar se ndodhej poshtë zonës së 21 Dhjetorit, ndërsa e pyetur nëse pronat kanë qenë të regjistruara është përgjigjur:

“Jo nuk kanë qenë të regjistruara, drejtoria e sportit s’ka pasur informacion të qartë për ekzistencën e ndonjë pronari, apo se ishin zaptuar. Unë u kam kërkuar eprorëve”, ka deklaruar ajo ndër të tjera.

Zbardhja e dëshmisë së dhënë në Gjykatë.

Shqevi: Kam qenë e punësuar si juriste në 2007 dhe më pas kam qenë në rolin e kryetares për strategjinë e sportit për vitet 2008-2020.

Qëllimi i strategjisë ishte për sportin elitar, përmirësimin dhe rritjen e infrastrukturës në vend.

Në vitin 2005 ishte miratuar një objektiv 2-vjeçar për modernizimin e klubeve sportive. Klubi ishte nën përgjegjësinë e Ministrisë së Sporteve, e njoh si klub sportiv, në atë kohë ne menaxhonim të gjithë klubin sportiv shumë sporte, përveç futbollit. Klubi kishte asest, kishte godina, gjimnastikën, ishte dhe një godinë tjetër që kishte mundje, peshëngritje.

SPAK: Ku ishin këto godina?

Shqevi: Ishin dy në qendër të klubit, si mund të themi poshtë 21 Dhjetorit, si zonë.

SPAK: Sa palestra kishte?

Shqevi: Ishte palestra e gjimnastikës, po ashtu palestra e basketbollit dhe volejbollit. Në memorien time ishin palestrat e tjera.

SPAK: A kanë qenë të regjistruara?

Shqevi: Jo, nuk kanë qenë të regjistruara, drejtoria e sportit s’ka pasur informacion të qartë për ekzistencën e ndonjë pronari, apo se ishin zaptuar. Unë u kam kërkuar eprorëve…

SPAK: Në qershor 2008 Ministria e Turizmit, shfaqet iniciatore për ligjin për sportin, përveç koncesionit shfaqet dhe privatizimi, keni dijeni për këtë?

Shqevi: Po në atë kohë përveç klubeve do të bëhej edhe privatizimi i objekteve, në atë kohë një grup teknik do të bënte një strategji për përmirësimin e sportit. Kemi bërë përpjekje për rritjen e infrastrukturës, pasi ne ishim me infrastrukturë, shumë më të vogël për pjesën sportive. Ne kërkuam që nëse do të privatizohen, shteti duhet t’i zëvendësonte ato me hapësira të tjera. Ne ishim pro rritjes së infrastrukturës sportive. Ne kemi kërkuar zbatimin e ligjit rumun, nëse do të ndodhte privatizimi./ CNA