Dita e Shën Parashqevisë në Kamenicë/ Templarë nga Italia vijnë enkas për këtë ditë

26 Korrik 2025, 14:48, Aktualitet CNA

Dita e Shën Parashqevisë në Kamenicë/ Templarë nga

Në kishën shekullore të Shën Parashqevisë në Kamenicë u mbajt një meshë e shenjtë nga At Ilia Kotnani, në nderim të shenjtores së madhe të besimit ortodoks. Kjo ceremoni simbolike u shoqërua nga pjesëmarrja e veçantë e një grupi templarësh nga Italia, të ardhur nga qytete të ndryshme si Padova dhe Venecia.

Në këtë ditë të shënuar, 11 anëtarë të “Shoqërisë së Besimtarëve Laikë” shprehën dëshirën për të krijuar një komandëri templare në Kamenicë, si një mënyrë për të forcuar lidhjet shpirtërore dhe kulturore mes Shqipërisë dhe Italisë.

Sipas tyre, templarët historikisht kanë mbrojtur vendet e shenjta dhe janë rikthyer sot për të kontribuar në ruajtjen e trashëgimisë dhe besimit të përbashkët.

Lorenzo Cechinato, njëri prej këshilltarëve të shoqërisë, ndau për CNA TV emocionet e veçanta që po përjeton në fshatin e Kamenicës.

"Ne jemi të krishterë, vijmë nga Italia, nga vende të ndryshme si Padova, Venecia. Kemi vëllezër shqiptarë që jetojnë këtu në Kamenicë. Duam që të krijojmë një komanderi në Kamenicë që të përfaqësojë ritet e templarëve. Shqipëria ka pasur në të shkuarën templarë, të cilët kanë mbrojtur pelegrinët dhe vendet e shenjta. Sot vijmë në vende të shenjta për të mbrojtur kishat. Janë vëllezërit tanë që jetojnë në Kamenicë, të cilët kanë ndihmuar për restaurimin e kishës 'Shën Maria' që vizituam pak më parë. Një nga qëllimet tona është që të vazhdojmë të forcojmë miqësinë që ekziston mes Shqipërisë dhe Italisë. Duam të sjellim paqen dhe kulturat tona të ndryshme për të bashkuar dy popujt. Ndër të tjera, të tregojmë që mund të arrijmë të bashkëjetojmë. Ne do të jemi dëshmitarë të besimit të krishterë."

Në mesazhin e tij, At Ilia Kotnani nënvizoi rëndësinë e ruajtjes së pasurive shpirtërore dhe kulturore, duke rikujtuar historinë e kishës 500-vjeçare që përkon me kohën e Skënderbeut. Ai theksoi dëmet që ajo ka pësuar ndër vite, veçanërisht gjatë regjimit komunist, por edhe përpjekjet aktuale për ringjalljen dhe vlerësimin e saj.

"Ky është një vend i veçantë sepse sipas traditës ortodokse duhet të evidentojmë të gjitha ato pasuri e banesa jo vetëm shpirtërore, por edhe fizike, që të kthehen në identitet. Të njohim më mirë historinë, të shkuarën e të parëve tanë, sakrificat që ata kanë bërë për të ndërtuar këto objekte si vlerësim që i bëhet Zotit. Kjo kishë ka histori të rrallë sepse është kishë 450-500-vjeçare, përkon me kohën e Skënderbeut. Gjithë pushtimet e huaja bënë të tyren, por më i egër ishte evazioni komunist, i cili shkatërroi, denigroi, e një pjesë e mirë e objekteve nuk i gjenden as themelet. Krahas manastirit dhe kishës tjetër në Kamenicë, po lulëzon edhe kjo kishë që në përmasa është e vogël, por në vlerë është shumë e madhe. Sot kemi ardhur të lutemi e të falemi."

Kisha e Shën Parashqevisë, edhe pse e vogël në përmasa, mbart një vlerë të madhe historike dhe shpirtërore. Kjo ditë u kthye në një simbol të bashkimit mes traditave, kulturave dhe qëndresës së besimit përballë kohëve të vështira./ CNA