CNA sulmohet nga Acromax/ Cukali: Politika përpiqet të cungojë informacionin

11 Qershor 2024, 22:34, Aktualitet CNA

Prej ditësh, Aldoir Nini, përndjekësi i fjalës së lirë, nëpërmjet kompanisë së tij Acromax, ka organizuar një sulm të organizuar ndaj CNA-së, me qëllimin e vetëm të censurojë informacionin.

Kjo nuk është hera e parë që Nini sulmon mediat e lira.Raportet ndërkombëtare tregojnë se liria e medias ka hasur përkeqësim.

Në një intervistë për CNA TV, me gazetaren Fabjona Pasho, kreu i Këshillit Shqiptar të Medias, Koloreto Cukali shprehet se sot platformat mediatike ndodhen në ditën e tyre më të keqe, të dirigjuara nga pushteti.

Sipas Cukalit, mungon vullneti politik, për t’i dhënë mediave hapësirë të kryejnë misionin e tyre të pandikuara dhe të pacensuruara.

"Në situatën ku ka arritur Shqipëria, krijimi i hapësirave të lirisë së medias është vullnet politik. Liria është tkurrur vazhdimisht ndër vite dhe kemi arritur në një pikë, ku unë mund të them me bindje se nuk mund të flasim më për liri të informacionit, në shumë rrafshe.

Kjo që përmendni ju është një nga format e cungimit të informacionit, pra nëj censurë që bëhet duke përdorur një pretekst të caktuar, duke ndërhyrë tek një platformë. Meqënëse sot publiku informohet përmes platformave, pra, publiku nuk vjen te faqja e CNA, por shkon në platformë për të lexuar, parë apo dëgjuar lajmin. Pra, kjo është një nga format se si cungohet liria e shprehjes, por format janë të shumta.

Në kushtet që ne jemi, ndryshimi vjen vetëm nga vullneti politik. Kemi një ndërthurje të financave, të ekonomisë, të biznesit, me politikën, por edhe me pronarë mediash, të cilët kanë krijuar një nyje shumë të fortë, e cila nuk mund të zhduket as me protesta gazetarësh, as me protesta publike dhe kërkon një vullnet shumë të madh politik.

Ka një konflikt interesash që është në thelb të cënimit të lirisë së medias dhe kjo do vullnet politik, të cilin unë nuk e shoh. Nuk ka asnjë arsye pse një qeveri, një kryeministër, apo një parti politike, apo një kryetar bashkie, që është në pushtet, që ka edhe paranë, ka edhe mjetet e censurës për të cilat po flasim. Pra, ka mundësi ta krijojë lajmin si do vetë.

Unë nuk shoh arsye, pse këta njerëz, po thonë ne po heqim dorë nga pushteti që kemi mbi median dhe lajmin, që këtu të ketë liri mediash. atyre iu nevojitet e kundërta. Një media e lirë do të thotë kontroll mbi pushtetet, në favor të publikut. Pse duhet të thotë një kryeministër, apo një kryetar bashkie, të thotë "po, tani ka ardhur momenti që unë të bëj këtë akt bamirës për lirinë e medias".

I kanë të gjitha mjetet për të kontrolluar narrativën publike dhe kjo iu duhet. Çdo njeriu në pushtet, në të gjithë botën, kjo i është dashur gjithmonë. Bën zullumet, por të kontrollohet nmarrativa, publikut t'i shfaqet një e vërtetë tjetër. Kjo të bën shumë komod në pushtetin që ke, të mbron dhe ta forcon pushtetin që ke. Pse duhet të heqësh dorë nga kjo?

Pa një përmbysje shumë të madhe politike, pa një ndryshim të kësaj klase politike, unë nuk shoh mënyrë tjetër në kushtet ku jemi."

CNA, do të vijojë të përçojë tek publiku të vërtetat e pacensuruara, do të investigojë dhe denoncojë çdo padrejtësi ndaj shqiptarëve, pavarësisht sulmeve që mund të hasim gjatë rrugës./ CNA