web counter
LEXO PA REKLAMA!

SHKARKO APP

App Store
Google Play

Busti i Llazar Fundos në zemër të Korçës/ Agim Xhafka: Boll jetuat me halucinacionet e diktaturës

29 Nëntor 2025, 10:14, Aktualitet CNA

Korça ka nderuar një nga figurat më të rëndësishme, jo vetëm të qytetit juglindor, por dhe të gjithë Shqipërisë, intelektualin e shquar Llazar Zai Fundon.

Në mes të qytetit, mu në zemër të Korçës, tashmë qëndron i lartësuar busti i tij, në sheshin që mban emrin e tij, Llazar Zai Fundo.

Një bust i punuar me mjeshtëri deri në detaje nga skulptori i njohur Adi Dule.

Llazar Fundo është një figurë komplekse e historisë shqiptare. Një intelektual poliglot me plot 9 gjuhë të huaja, që lindi në një familje tregtarësh nga Voskopoja në Korçë, më pas në rini u bë komunist, u pushkatua nga komunistët dhe përpara togës së pushkatimit la testamentin e tij: “Komunizma që idealizonim si Krishtin, për nga ligësitë ia kalon dhe djallit. Kam qenë komunist, por s’do të vdes kurrë i tillë. Mund të gënjeja për të shpëtuar kryet, por s’mund ta bëj një gjë të tillë. Fotot që janë në çantë t’i jepen nënës në rast se është gjallë”. Këto janë fjalët e një intelektuali të kalibrit europian.

Figura akademike e kanë vlerësuar vendosjen e bustit të Llazar Zai Fundos në Korçë, duke thënë se ky ishte një akt i vonuar, por në fund është vendosur në vendin e duhur.

Reagimet pozitive dhe vlerësuese ishin të shumta si nga radhët e politikanëve apo edhe nga historianë, shkrimtarë, qytetarë të cilët e njohin kontributin e tij të jashtëzakonshëm, si një nga firmëtarët e Manifestit të Ventotenes, Për një Europë të Bashkuar, pra një nga themeluesit e Bashkimit Europian.

Por me vendosjen e bustit të Llazar Fundos duket se kanë nisur dhe polemikat, por nga ziliqarët dhe ata që njësoj, siç historiani Aurel Plasari e theksoi, xhelozonin mendjet e ndritura.

Gazetari dhe shkrimtari i njohur Agim Xhafka e ka sqaruar duke renditur arsyet pse busti i Llazar Zai Fundos është vendosur aty ku i takon, në shtëpinë e tij në Korçë, në sheshin që tani mban emrin e tij, Llazar Zai Fundo.

“Sa u vendos busti i Zai Fundos nisën dhe polemikat. Zilitë tipike lokaliste. Pse u vendos bash në krye të vendit. Ndaj po sqaroj: Zai është vendosur te shtëpia e vet së pari. Së dyti ishte europiani i parë korçar. Së treti u internua dhe luftoi fashizmin. Së katërti u vra me porosi të Enver Hoxhës. Shkruar dënimi me dorën e tij. Së pesti ishte një intelektual i rrallë që na bën nder të gjithëve. Për të mos shkruar më shumë nxjerrja e tij nga harresa na bën mirë të gjithëve. Ta shohim historinë tonë pa syze të errëta, pa manipulime, pa shtrembërime. Boll jetuam me halucinacionet e diktaturës”, shkruan Agim Xhafka.

Busti i Llazar Fundos në zemër të Korçës/ Agim

Ky mendim i shkrimtarit dhe gazetarit, që më shumë tregon fakte, është mbështetur nga shumë qytetarë të cilët e njohin figurën e nderuar të intelektualit Llazar Zai Fundo dhe kontributin e tij të jashtëzakonshëm për një Europë të Bashkuar dhe të lirë./ CNA

 





Lajmet e fundit nga