E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Brenda ishullit ku u hodhën themelet e BE-së dhe u internua intelektuali Llazar Fundo

9 Qershor 2025, 11:56, Aktualitet CNA

Brenda ishullit ku u hodhën themelet e BE-së dhe u internua

Llazar Fundo

Një grup xhirimi nga televizioni “Klan” me regjisorin Indrit Kasmi dhe operatorin Jurgen Malo, drejtuar nga gazetari Blendi Fevziu ka shkuar sot në Ventotene.

Ventotene është ishulli ku u hodhën themelet e Bashkimit Europian, ku ka pasur dhe një grup intelektualësh antifashistë të internuar si Llazar Fundo, Zef Mala, Kryezinjtë, Butkallinjtë etj.

Gjithashtu së bashku me ekipin e “TV Klan” dhe Blendi Fevziun ndodhet edhe gazetari Elvi Fundo.

Një tjetër personazh është Niko Peleshi, këtë herë jo si një ish-ministër apo kreu i grupit parlamentar të PS-së, por si djali i njërit prej të internuarve në Ventotene. Babai i tij ka qenë 15 vjeç i internuar në këtë ishull.

Po ashtu edhe Adi Dule është pjesë e këtij dokumentari, personi i cili po modelon bustin e intelektualit Llazar Fundo.

Grupi i xhirimit pritet të sjellë një material ekskluziv edhe nga ishulli i San Stefano-s që ndodhet disa qindra metra larg nga Ventotene ku ndodhet një burg i vitit 1700, në të cilin ishin të internuar antifashistët shqiptarë dhe disa nga intelektualët, filozofët dhe politikanët më të mëdhenj më pas të Europës si ish-presidenti i Italisë Sandro Pertini, Altiero Spinelli, i cili është quajtur “Il padre della Europa”, pra “Babai i Europës”.

Ky grup xhirimi që vjen në Ventotene pritet të sjellë disa materiale shumë të rëndësishme ekskluzive të cilat janë edhe për herë të parë, por edhe disa të publikuara. Do të ketë intervista, plane pamje, dokumente të cilat tregojnë se si intelektualët shqiptarë kanë qenë pjesë e themeleve të asaj që sot quhet BE.

Një material mjaft i rëndësishëm jo thjesht dhe vetëm historik dhe politik, por dhe informues për të treguar vlerat që kanë përfaqësuar një elitë shqiptarësh të mirëshkolluar dhe të ditur antifashistësh që luftuan për Shqipërinë dhe Europën të cilët janë krenaria jonë më e mirë dhe pasaporta jonë më e vërtetë europiane./ CNA