web counter
LEXO PA REKLAMA!

SHKARKO APP

App Store
Google Play

“Brenda burgjeve ka një botë tjetër”/ Artan Hoxha: Të dënuarit marrin me kamera live nga qelia

19 Maj 2026, 21:25, Aktualitet CNA

“Brenda burgjeve ka një botë tjetër”/ Artan Hoxha:

Gazetari Artan Hoxha ka deklaruar se burgjet në Shqipëri përballen me probleme serioze të sigurisë dhe kontrollit të brendshëm, duke pretenduar se bosët e trafikut të drogës arrijnë të ushtrojnë ndikim edhe brenda burgjeve.

Në një intervistë në A2CNN, Hoxha tha se sfida kryesore nuk është infrastruktura e institucioneve penitenciare, por menaxhimi i tyre dhe kushtet në të cilat punon stafi i sigurisë.

Sipas tij, personat e dënuar për trafik ndërkombëtar droge disponojnë mjete financiare të konsiderueshme, çka u mundëson të sigurojnë favore apo lehtësira edhe brenda burgjeve.

Ai pretendoi se përdorimi i telefonave celularë nga të dënuarit mbetet një fenomen i pranishëm, pavarësisht sistemeve që synojnë bllokimin e sinjalit, ndërsa komunikimet nga ambientet e burgut, sipas tij, ndodhin më shpesh sesa pranohet publikisht.

Hoxha theksoi se në disa raste krijohen struktura informale influence brenda institucioneve të vuajtjes së dënimit, duke shtuar se autoritetet përpiqen të ruajnë balancën dhe rendin për të shmangur tensione apo incidente të mundshme mes të dënuarve.

“Ti aty ke bosë droge që kanë lëvizur me tonelata kokainë dhe që kanë sasi të konsiderueshme parash, me gardianë që paguhen me rroga qesharake, sigurinë e burgut nuk e ruan trashësia e murit, por niveli i stafit që ke brenda. Që të fusësh një celular brenda, është tarifë fikse 2 mijë euro në muaj, sepse në burgje ka aparatura bllokuese të valëve, por ndodh e kundërta. Ai të del edhe nga burgu, edhe të merr me kamera atje, ta bën të qartë, ndërsa je në emision Live. Brenda burgjeve ka një botë tjetër, një nivel tjetër hierarkie, shpesh herë autoritetet, janë të detyruar të bëjnë një lloj pakti, ose marrëveshje me ta, t’u ofrojnë disa lehtësira që ata të mbajnë çik rregull atje brenda. Sepse po hyre në konflikt në një burg me 800 të dënuar, i ke hapur punë vetes”, deklaroi Hoxha./ CNA





Lajmet e fundit nga