Gjobat dhe heqja e tendave/Tregtarët e tregut maqedonas në Korçë në protestë

19 Maj 2026, 14:03, Aktualitet CNA

Tension dhe pakënaqësi në tregun maqedonas në qytetin e Korçës. Tregtarët që ushtrojnë aktivitetin prej vitesh në këtë zonë shprehen se janë përballur sërish me kontrolle dhe gjoba nga autoritetet, këtë herë për vendosjen e tendave dhe ekspozimin e mallrave jashtë ambienteve të dyqaneve.

Ata thonë se masat janë të papërballueshme ekonomikisht dhe se po rrezikojnë mbylljen e bizneseve të tyre. Sipas tregtarëve, problematika lidhet me kërkesën për heqjen e tendave ekzistuese dhe vendosjen e strukturave të reja sipas një projekti të caktuar. Ata pretendojnë se nuk kanë mundësi financiare për të përballuar kostot, ndërsa gjobat e vendosura arrijnë deri në 50 mijë lekë.

Një prej tregtarëve, i revoltuar, shprehet se është gjobitur në një kohë kur nuk kishte mundësi fizike për të hequr tendën, për shkak të problemeve shëndetësore dhe motit të keq.

“Shiko çfarë po bëjnë! E pa tendën, erdhi ia futi gjobën… Tani e hoqën njerëzit se gjynah, që po marrin pesëdhjetë mijë lekë gjobë. Ku t’i gjej unë? Unë jam me ilaçe… Vijnë me radhë tani, gjoba atje, gjoba atje. Ishte kohë shiu, nuk e hiqja dot tendën, jam i sëmurë. Sot më erdhi ustai ta heqë dhe ata erdhën e më vunë gjobën. Është turp”, tha një tregtar.

Tregtarët tregojnë se kjo situatë vazhdon prej vitesh dhe se kërkesat kanë ndryshuar vazhdimisht, duke krijuar pasiguri për aktivitetin e tyre.

“Kemi 10 vjet me të njëjtin muhabet. Hiqini llamarinat, i hoqëm. Vendosni tenda, i vumë vetë. Tani duan tenda të kuqe me projekt arkitekti. U thamë nuk kemi mundësi të paguajmë arkitekt. Po të dojë bashkia, le t’i vendosë vetë. Sot po vendosin gjoba kot së koti. Edhe tendat i hoqën, edhe gjobat i morën”, u shpreh një tregtar.

Një tjetër tregtare thotë se është penalizuar për reklamimin e mallrave, ndërsa kërkon që institucionet të japin një zgjidhje përfundimtare për tregun.

“Mora një gjobë 50 mijë lekë. Më thanë jo për tendën, po për reklamimin e mallit. Erdhën tre policë. U thashë mos ma vini aq shumë, po prapë ma vunë. Unë nuk e heq tendën. Po të duan, le ta mbyllin fare tregun dhe të ikim në shtëpi. Kam 24 vjet këtu”, tha një tjetër.

Tregtarët kërkojnë dialog me institucionet vendore dhe një zgjidhje që, sipas tyre, të mos rëndojë më tej ekonominë e familjeve që jetojnë prej dekadash nga aktiviteti në tregun maqedonas të Korçës.