web counter
LEXO PA REKLAMA!

SHKARKO APP

App Store
Google Play

E fundit!

x

Berisha vizitë në Berlin, takime në Bundestag

27 Qershor 2026, 13:30, Aktualitet CNA

Berisha vizitë në Berlin, takime në Bundestag

Kryetari i Partisë Demokratike, Sali Berisha, ka zhvilluar një vizitë në Berlin, ku është fokusuar në forcimin e bashkëpunimit me CDU-në gjermane dhe në denoncimin e situatës politike në Shqipëri.

Gjatë kësaj vizite, të shoqëruar nga nënkryetari i grupit parlamentar të PD-së, Tomor Alizoti, Berisha mori pjesë në festën e 50-të verore të Qarkut Parlamentar të Ndërmarrjeve të Mesme të CDU/CSU-së, një aktivitet ku ishte i pranishëm edhe Kancelari Friedrich Merz.

Në një njoftim për mediat, Berisha bëri të ditur se qëllimi i vizitës ishte forcimi i lidhjeve me partnerët gjermanë dhe pasqyrimi i gjendjes së rëndë në vend.

"Në takimet në Bundestag dhe CDU shpreha mirënjohjen për mbështetjen ndaj Shqipërisë dhe Partisë Demokratike. I njoha bashkëbiseduesit me krizën e thellë që po kalon vendi nën diktaturën autokratike të Edi Ramës, si dhe me qëndrimin cinik të qeverisë ndaj protestave të fuqishme të rinisë shqiptare."

Gjatë qëndrimit në Berlin, Berisha zhvilloi takime të veçanta me personalitete të larta të politikës gjermane, përfshirë zëdhënësin për Politikën Europiane të grupit CDU/CSU, Tilman Kuban, drejtuesin e zyrës për marrëdhënie ndërkombëtare të CDU-së, Christian Kremer, si dhe raportuesin për Ballkanin Perëndimor, Peter Beyer. Gjithashtu, kryedemokrati u takua me ekspertin e financave dhe buxhetit, Olav Gutting, ish-kryetarin e Komisionit të Jashtëm në Parlamentin Europian, Elmar Brok, si dhe gazetarin e mirënjohur të "Bild", Peter Tiede.

Vizita u mbyll me një takim me përfaqësues të diasporës shqiptare në Gjermani, përfshirë ish-zyrtarin Gani Dreshaj. / CNA





Lajmet e fundit nga