E fundit!

14:01 Live Updates

Irfan Hysenbelliu, mashtruesi që kërkon të dalë kundër shtetit

Irfan mashtruesi kundër shtetit 20 Korrik...

Baza ajrore e Kuçovës, pse NATO zgjodhi Shqipërinë

16 Shkurt 2024, 09:48, Aktualitet CNA

Një ditë më parë, Sekretari Amerikan i Shtetit, Antony Blinken, njoftoi se muajin e ardhshëm do të hapet baza ajrore e Kuçovës. Kjo bazë është një investim i NATO-s. Punimet nisin në janar të vitit 2022.

NATO ka investuar mbi 50 milionë euro për të modernizuar bazën ajrore. Kuçova do të shërbejë edhe si bazë kombëtare për Forcën Ajrore Shqiptare dhe ky investim strategjik i NATO-s, pritet të sjellë në Shqipëri një standard të ri për Forcat e Armatosura.

Kuçova do të shërbejë si bazë mbështetëse për NATO-n duke ofruar transport ajror, mbështetje logjistike, policimin ajror, si dhe trajnime dhe stërvitje.

Baza ajrore e Kuçovës, e vendosur rreth 70 km në jug të Tiranës, u ndërtua në vitet 1950 për të pritur avionët e Forcave Ajrore Shqiptare. Shqipëria u anëtarësua në NATO në vitin 2009.

Shqipëria si një vend anëtar i NATO-s u zgjodh nga Aleanca për ndërtimin e një baze taktike ajrore në rajon dhe në janar të vitit 2022 filloi puna në terren për realizimin e projektit për modernizimin e Bazës Ajrore në Kuçovë, për ta shndërruar atë në një bazë taktike të NATO-s.

Autoritetet shqiptare e konsiderojnë projektin sa ambicioz aq edhe të rëndësishëm për sigurinë kombëtare të Shqipërisë, por edhe për sigurinë rajonale. Projekti në fjalë përfshin punimet që do të përmirësojnë infrastrukturën për kontrollin dhe sigurinë e fluturimeve, pistën, rrugët lidhëse, si dhe asetet e tjera ndihmëse.

Baza do të jetë në përdorim të të dyja palëve, të ushtrisë shqiptare dhe NATO-s. Shqipëria është vend anëtar i NATO-s që prej prillit të vitit 2009, ndërsa në dekadën e fundit Aleanca dhe Shqipëria kanë rritur partneritetin e tyre në fushën e mbrojtjes dhe sigurisë.

Ushtria shqiptare që nga anëtarësimi në NATO është përfshirë në një proces transformimi dhe modernizimi, që nga kualifikimi i personelit, përmirësimi e infrastruktura ushtarake dhe modernizimi me pajisjet e mjetet e saj./CNA