Belind Këlliçi, takime “kokë më kokë” me banorët/ “Tiranën do ta fitojmë me qytetarët”

17 Shkurt 2023, 15:10, Aktualitet CNA

Belind Këlliçi, takime “kokë më kokë” me

Kandidati i PD-së për Bashkinë e Tiranës, Belind Këlliçi, ka vazhduar turin “Jam këtu t’ju dëgjoj”, për zhvillimin e takimeve me qytetarët, tashmë me banorët e njësisë numër 5.

Gjatë takimeve nuk munguan ankesat, problematikat dhe shqetësimet e shumta nga qytetarët lidhur me indiferencën e institucioneve dhe fuqisë blerëse.

“E di atë krimbin në gur? Tërhiq e shty! Tërhiq e shty! Nga mëngjesi, në darkë. Unë kam 40 vjet specialiste, por njerëzit nuk vijnë më të bëjnë një veshje të re. Vijnë të arnojnë një palë pantallona. Turp për atë që e sjell, turp dhe për mua që e vë në makinë”, tregoi një rrobaqepëse e zonës.

“Ka mbaruar çdo gjë. Po na vjen fundi avash-avash. Jemi në një moshë që as kurbetin nuk e mbajmë dot”, tha një tregtar tjetër, i cili e ftoi Këlliçin të shihte vetë raftet bosh në dyqan.

Ndërsa ka shtrënguar duart me qytetarët dhe ka biseduar me ta për problemet e përditshme dhe pritshmëritë nga pushteti vendor, Belind Këlliçi ka dëgjuar ankesat për cilësinë e ujit.

“Ai na jep ujin të papijshëm. Unë ujin e blej dhe më fut 34 mijë lekë ujë në faturë.

E përzunë studentët aty dhe pa pikë turpi fliste me ta”, tregoi njëri prej tyre.

“Djali i madh më ka ikur në Norvegji. Do më ikë edhe i vogli tani. Do të mbetem vetëm me gruan”, rrëfeu një tregtar tjetër në bisedën me Këlliçin.

Ankesat e banorëve e kanë çuar Këlliçin dhe ekipin e tij në një zonë të harruar nga bashkia, pjesë e njësisë nr. 5. Ndërsa interesohej se përse sheshi mes pallateve ishte shndërruar në një pellg me ujë të ndotur, Këlliçi mori këtë përgjigje nga një banor i zonës: “Ka prej vitesh kështu, gjol. Për faqen e zezë.

Këtë bashkia e ka bërë me poshtërsi që kur ka dhënë tenderin para 5 vitesh për kanalizimet për të gjithë lagjen dhe kanë plasur ujërat e zeza”. Turi i Dëgjimit po vijon në çdo njësi të Tiranës, nga qendra në rrethina. Belind Këlliçi ka zgjedhur t'u ofrojë hapësirën e tij publike qytetarëve, me të cilët po harton programin e tij elektoral./CNA.al