Pavarësia e Kosovës/ Erion Veliaj shpallet “Qytetar Nderi” nga Komuna e Prizrenit

17 Shkurt 2023, 14:01, Aktualitet CNA

Pavarësia e Kosovës/ Erion Veliaj shpallet “Qytetar Nderi”

Kryebashkiaku i Tiranës, Erion Veliaj, në 15-vjetorin e shpalljes së Pavarësisë së Kosovës, është nderuar me titullin “Qytetar Nderi” nga Komuna e Prizrenit.

Kreu i Komunës së Prizrenit, Shaqir Totaj, teksa i dha titullin, tha se Veliaj po jep shembullin e një drejtuesi modern që ka transformuar Tiranën.

Gjatë fjalës së tij, Veliaj u zotua se do të kontribuojë më shumë për qytetin e Prizrenit, teksa tha se është i nderuar dhe se duhet punuar bashkë për qëllime të përbashkëta.

“Sot, si qytetari më i ri i Prizrenit, ndiej një detyrim që, përveçse të vë përpara punët e qytetit të Tiranës, ta mbaj gjithmonë një hapësirë të kohës sime, të energjive të mia, për ta promovuar Prizrenin. Është lajm i jashtëzakonshëm që sot Prizreni, qyteti historik, qyteti multifetar, multietnik, është bërë një qendër graviteti. Për sa kohë sot kthehet në një qytet që promovon vlera, promovon mirësi, dashuri, kulturë, art, unë besoj se ditët më të mira në qytetin tonë të Prizrenit i kemi përpara. Sot jam i nderuar që, bashkë me mua janë Blerina dhe Etjeni, deputetë të Parlamentit të Shqipërisë, për të dëshmuar që ne jemi bashkë. Ne mund të kemi punë të ndryshme, mund të kemi vokacione të ndryshme, mund të kemi parti të ndryshme, ama për disa qëllime ne punojmë bashkë. Dallimet tona nuk janë aq të mëdha sa të na përçajnë dhe duhet të punojmë për qëllime të përbashkëta”, u shpreh Veliaj.

Kryetari i Komunës së Prizrenit e vlerësoi Veliajn si njeri me energji pozitive, për t’u marrë shembull për transformimin e Tiranës. Shaqir Totaj tha se punët e mira të përbashkëta sapo kanë filluar, teksa u shpreh se ajo që i pret përpara është akoma më e madhe.

“Është nder të kesh një bashkëqytetar si Erioni. Ai dallohet si kryebashkiak i Tiranës me një qasje proaktive, me një energji pozitive, me një lidership modern, që na bën krenarë të gjithëve ne që jetojmë në Kosovë, në Prizren dhe kudo në Shqipëri. E keni parë Tiranën si është transformuar. Kur jemi takuar me Erionin vitin e kaluar jemi dakorduar që do të bëjmë shumë punë të mira. Ato punë të mira vetëm sa kanë filluar. Kemi binjakëzim të dy shkollave të muzikës. Kemi pasur gara sportive mes shkollash. Po ashtu, kemi pasur një festë madhështore me rastin e Lidhjes së Prizrenit vitin e kaluar. Ajo që na pret është akoma më e madhe. Do promovojmë bashkëpunimin mes qyteteve”, tha Totaj./CNA.al