Avokati përjashtohet nga gara për anëtar të KLP-së dhe KLGJ-së/ “Vendim subjektiv”

23 Maj 2024, 09:20, Aktualitet CNA

Avokati Saimir Vishaj është përjashtuar nga gara për kandidimin si anëtar për KLP dhe KLGJ.

Në reagimin e tij, Vishaj thekson se ndihet i keqardhur nga ky përjashtim, sipas tij pa asnjë arsye, duke pretenduar se ka kaluar të gjitha filtrat e përcaktuara nga institucioni i Avokatit të Popullit.

Avokati Vishaj ka renditur arritjet në karrierën e tij, duke nënvizuar se ka një figurë të pastër.

Vishaj e quan përjashtimin e tij subjektiv.

Reagimi i avokatit Saimir Vishaj

Nëpërmjet e-mailit u njoftova ditën e sotme për përjashtimin nga gara për kandidimin tim për anëtar për KLP dhe KLGJ. Ndihem shumë i keqardhur nga ky përjashtim pa asnjë arsye, pasi më parë kisha kaluar të gjitha filtrat e përcaktuara nga institucioni i Avokatit të Popullit.

Kam 34 vite në marrëdhënie pune, ku 3 prej të cilave si Oficer i Policisë Gjyqësore dhe pjesa tjetër e jetës si avokat, me mbi 25 vite si avokat, tatimpagues i rregullt. Jam certifikuar 2 herë me certifikatë sigurie, në vitin 2003 si ekspert në Komisionin e Sigurisë, dhe 3 vjet si monitorues i Reformës në Drejtësi i zgjedhur nga Kuvendi i Shqipërisë.

Figura ime si avokat është shumë e pastër, ku ka kam dhënë kontributin tim nga viti 2016 e në vazhdim për Reformën në Drejtësi në të gjitha tryezat e rrumbullakëta nga të gjitha hallkat e sistemit, si nga Kuvendi i Shqipërisë, Ministria e Drejtësisë dhe shoqëria civile. Në vitin 2021 kam fituar nga radhët e pedagogjisë për të konkurruar si anëtar i KLP-së, por në Komision të Ligjeve kam marrë 2 vota të opozitës, ndërkohë 3 vota ishin kundër nga deputetët e PS-së.

Si monitorues për në Kuvendin e Shqipërisë kam marrë 73 vota pozite dhe opozite duke depozituar pranë Komisionit të Ligjeve gjetjet e mia në kuadrin e ndërtimit të institucioneve të reja të drejtësisë. Në këto kushte, nisur nga eksperienca ime profesionale dhe me integritet në fushën e avokatisë, vetëm një mendim apo vendim subjektiv më përjashton nga gara për anëtar të KLP-së. Mendoj që arsyeja është se nuk jam anëtar i ndonjë force politike duke na sjellë ushtarë partie për këto organe si KLP dhe KLGJ. Unë me detyrim nuk bëhem dot anëtar, edhe pse prania ime në këto organe do të ishte në të mirë të funksionimit të këtyre institucioneve.

Sa për DSIK dhe SHIK-u të cilët me zor duan të më bëjnë operativ, nuk ma nxin dot faqen dhe profesionalitetin tim. Unë jam bërë gjysh dhe e vetmja gjë për të cilën më vjen keq është se ç’do t’i them nipit, çfarë kam bërë, pse nuk më pranuan, ndërkohë që përjashtimi im është subjektiv, nuk na doni, kurrë mos na doni. Doni paaftësinë, zgjidheni, doni ndershmërinë dhe profesionalitetin, mos e zgjidhni. Ju faleminderit për konsideratën duke bërë të shtohen radhët e të pakënaqurve kundër Reformës në Drejtësi. Ju faleminderit për vëmendjen që më kushtuat!/ CNA