Sa do të jetë pagesa për kryetarin dhe anëtarët e Komisionit të Licencave për lojërat e fatit

22 Maj 2024, 15:54, Aktualitet CNA

Sa do të jetë pagesa për kryetarin dhe anëtarët e

Foto ilustruese

Në mbledhjen e sotme të Këshillit të Ministrave është miratuar pagesa e anëtarëve të Komisionit të Licencave në Autoritetin e Mbikëqyrjes së lojërave të fatit.

Këshilli i Ministrave vendosi që kryetari i komisionit të paguhet 35 mijë lekë për mbledhje. Nga ana tjetër, anëtarët e komisionit do të marrin 30 mijë lekë për mbledhje.

Sipas vendimit, çdo pagesë e anëtarëve të komisionit do të bëhet mbi bazën e dokumentit të listëprezencës ose procesverbalit, që vërteton pjesëmarrjen në mbledhjet e komisionit.

“VENDIM PËR PËRCAKTIMIN E MASËS SË SHPËRBLIMIT TË KRYETARIT DHE TË ANËTARËVE TË KOMISIONIT TË LICENCAVE NË AUTORITETIN E MBIKËQYRJES SË LOJËRAVE TË FATIT

Në mbështetje të nenit 100 të Kushtetutës, të pikës 8, të nenit 17/1, të ligjit nr.155/2015, “Për lojërat e fatit në Republikën e Shqipërisë”, të ndryshuar, dhe të shkronjës “a”, të pikës 5, të nenit 8, të ligjit nr.35/2023, “Për kompetencat për caktimin e pagave, trajtimeve të tjera financiare dhe përfitimeve të të punësuarve në institucionet e administratës publike, si dhe të pagës bazë minimale në shkallë vendi”, me propozimin e ministrit të Financave, Këshilli i Ministrave

V E N D O S I:

1. Kryetari dhe anëtarët e Komisionit të Licencave për shqyrtimin dhe vlerësimin e aplikimeve të paraqitura në lidhje me aktivitetin e lojërave të fatit, pranë Autoritetit të Mbikëqyrjes së Lojërave të Fatit shpërblehen, si më poshtë vijon:

a) Kryetari i komisionit, në masën 35 000 (tridhjetë e pesë mijë) lekë për mbledhje;

b) Anëtarët e komisionit, në masën 30 000 (tridhjetë mijë) lekë për mbledhje.

2. Çdo pagesë e anëtarëve të komisionit bëhet mbi bazën e dokumentit (listëprezencë ose procesverbal), që vërteton pjesëmarrjen në mbledhjet e komisionit.

3. Efektet financiare për shpërblimin e anëtarëve të Komisionit të Licencave, sipas pikës 1, të këtij vendimi, përballohen nga buxheti i Autoritetit të Mbikëqyrjes së Lojërave të Fatit.

4. Ngarkohet Autoriteti i Mbikëqyrjes së Lojërave të Fatit për zbatimin e këtij vendimi.

Ky vendim hyn në fuqi pas botimit në “Fletoren zyrtare”.”, theksohet në VKM./ CNA