Amnistia penale/ Shoqata e Avokatëve Penalistë të Shqipërisë mbështet nismën e Ministrisë së Drejtësisë

29 Dhjetor 2025, 15:54, Aktualitet CNA

Amnistia penale/ Shoqata e Avokatëve Penalistë të

Shoqata e Avokatëve Penalistë të Shqipërisë ka mbështetur amnistinë penale të propozuar nga Ministria e Drejtësisë. Kryetarja e Shoqatës, Joana Qeleshi, shprehet se amnistia nuk duhet parë si cenim i drejtësisë apo si favorizim i pandëshkuar.

Në deklaratë thuhet se kjo masë synon rivendosjen e proporcionalitetit të ndëshkimit, uljen e mbipopullimit në burgje dhe respektimin e detyrimeve ndërkombëtare të shtetit shqiptar.

Më tej shtohet se pranimi i problematikave të sistemit gjyqësor dhe ashpërsisë së masave të sigurimit dhe masave të dënimit nga Ministria e Drejtësisë është hap pozitiv, i cili duhet shoqëruar me masa ligjore të detyrueshme për Gjyqësorin.

Bëhet gjithashtu me dije se së shpejti Shoqata e Avokatëve Penalistë të Shqipërisë do të paraqesë edhe propozimet konkrete në përmirësimin e legjislacionit procedural penal dhe atij penal në këtë drejtim.

Deklarata e plotë:

Shoqata e Avokatëve Penalistë të Shqipërisë përshëndet amnistinë e propozuar nga Ministria e Drejtësisë, duke mbështetur miratimin sa më të shpejtë të saj!

Sot, Shqipëria përballet me një numër të lartë personash të dënuar dhe paraburgosur, përfshirë edhe për vepra penale me rrezikshmëri të ulët shoqërore, ndërkohë që dënimet e dhëna shpesh rezultojnë dukshëm më të ashpra në krahasim me praktikat e vendeve evropiane. Mbipopullimi kronik i institucioneve të vuajtjes së dënimit përbën një problem serioz, i cili ka çuar dhe rrezikon të çojë në shkelje të nenit 3 të Konventës Evropiane për të Drejtat e Njeriut, që ndalon trajtimin çnjerëzor dhe poshtërues.

Në këtë kontekst, Shoqata thekson se amnistia nuk duhet parë si cenim i drejtësisë apo si favorizim i pandëshkuar, por si një masë korrigjuese dhe humanizuese, që synon rivendosjen e proporcionalitetit të ndëshkimit, uljen e mbipopullimit në burgje dhe respektimin e detyrimeve ndërkombëtare të shtetit shqiptar.

Një politikë penale moderne dhe evropiane kërkon balancë midis nevojës për ndëshkim dhe respektimit të dinjitetit njerëzor, rehabilitimit dhe riintegrimit shoqëror. Në këtë frymë, Shoqata e Avokatëve Penalistë të Shqipërisë nxit institucionet që çdo iniciativë për amnisti të trajtohet me seriozitet, transparencë dhe mbi bazën e parimeve të drejtësisë, humanizmit dhe shtetit të së drejtës!

Pranimi i problematikave të sistemit gjyqësor dhe ashpërsisë së masave të sigurimit dhe masave të dënimit nga Ministria e Drejtësisë është hap pozitiv, i cili duhet shoqëruar me masa ligjore të detyrueshme për gjyqësorin. Së shpejti Shoqata e Avokatëve Penalistë të Shqipërisë do të paraqesë edhe propozimet konkrete në përmirësimin e legjislacionit procedural penal dhe atij penal në këtë drejtim.

Urojmë që amnistia të jetë një hap i parë pozitiv drejt trajtimit me dinjitet e drejtësi të qytetarëve në konflikt me ligjin!

Ministri i Drejtësisë, Besfort Lamallari, komunikoi dje nismën e qeverisë shqiptare për amnistinë penale. Ministri tha se amnistia hap rrugën që 380 persona të përfitojnë lirim të menjëhershëm dhe rreth 900 të tjerë ulje dënimi, duke ulur në këtë mënyrë edhe popullimin në burgje me gati 7%.

Lamallari thekson se kjo amnisti është pjesë e një politike penale moderne, që synon rehabilitimin, uljen e mbipopullimit në burgje dhe forcimin e sigurisë afatgjatë. /CNA