Aksioni i lirimit të hapësirave publike/ Prishen disa subjekte përgjatë shëtitores në Shkodër

28 Korrik 2025, 12:15, Aktualitet CNA

Aksioni i lirimit të hapësirave publike/ Prishen disa subjekte

Ka vijuar edhe këtë fillim jave aksioni i Policisë Bashkiake në pedonalen kryesore pranë Bashkisë së Shkodrës, me qëllim lirimin e hapësirave publike të zëna pa leje nga subjekte private. Njësi të shumta të policisë bashkiake, të mbështetura edhe nga punonjës të ndërmarrjes publike të bashkisë, ndërhynë në disa pika përgjatë shëtitores për të larguar tavolina, stenda apo materiale të tjera të vendosura në kundërshtim me rregulloren urbane.

Ky aksion është pjesë e një fushate të nisur disa ditë më parë, që synon të rikthejë funksionin publik të zonave këmbësore dhe të garantojë akses të barabartë për qytetarët. Autoritetet vendore kanë bërë të ditur se janë njoftuar paraprakisht të gjitha subjektet që veprojnë në zonë, duke u kërkuar që të largojnë vullnetarisht çdo element të jashtëligjshëm nga hapësirat publike.

Megjithatë, jo të gjitha bizneset kanë bashkëpunuar. Në disa raste bizneset nuk i kanë liruar hapësirat publike në kohë duke pretenduar se po penalizohen pavarësisht se kanë kërkuar leje. Zyrtarët lokalë theksuan se toleranca ndaj shkeljeve ka përfunduar dhe se do të vijojë kontrolli i përditshëm deri në rikthimin e rendit urban.

Qytetarët janë të ndarë për këtë aksion. Disa e mbështesin, duke theksuar se pedonalja duhet t’u shërbejë kalimtarëve e jo të shndërrohet në rrugë me pengesa, ndërsa të tjerë i shohin masat si të ashpra, duke kërkuar një zgjidhje të ndërmjetme që të ruajë funksionin social dhe ekonomik të zonës.

Nga ana e saj, Bashkia e Shkodrës ka paralajmëruar se pas përfundimit të këtij aksioni, do të nisë një fazë e re e riorganizimit të hapësirave publike në të gjithë qytetin, me qëllim standardizimin e përdorimit të tyre dhe krijimin e kushteve më të mira për jetesë urbane.

Aksioni për lirimin e hapësirave publike do të vijojë pa ndërprerje nga policia bashkiake në akset kryesore dhe më pas do të zhvendsoet edhe në pjesët më periferike të qytetit për të liruar plotësisht hapësirat publike të zëna padrejtësisht nga subjekte të ndryshme por edhe individë./ CNA