100-vjetori i “Urdhrit të Skëndërbeut”/ Ndahen dekorata për disa personalitete

10 Dhjetor 2025, 20:50, Aktualitet CNA

100-vjetori i “Urdhrit të Skëndërbeut”/ Ndahen

Në aktivitetin për 100-vjetorin e “Urdhrit të Skënderbeut” janë dekoruar disa personalitete të rëndësishme të vendit.

Ish-presidenti, Alfred Moisiu u nderua me dekoratën “Ylli i Madh i Urdhrit Suprem të Shqiponjës”. Moisiu gjatë fjalës së tij, tha se e konsideron këtë vlerësim si mesazh se vlera, puna dhe integriteti mbeten gjithmonë të çmuara.

“Ju falënderoj shumë për këtë medalje. Në moshën time, 96 vjeç, ky vlerësim merr tjetër kuptim për mua, si dëshmi e përpjekjeve për vendin dhe qytetarët. Falënderoj familjen, bashkëpunëtorët, miqtë, që më kanë dhënë forcë e motivim të vazhdueshëm. E konsideroj këtë medalje, si mesazh se vlera, puna dhe integriteti mbeten gjithmonë të çmuara. Në familjen time, dashuria për atdheun ka qenë motiv i trashëguar. Ju siguroj se do vazhdoj më tej, pavarësisht nga mosha. Gjithmonë do jem në shërbim të kombit tonë”, tha Moisiu.

Studiuesi dhe përkthyesi i njohur, Aurel Plasari u dekorua me medaljen “Oficer i Madh”. Pas marrjes së medaljes, Plasari mbajti edhe fjalën e tij, ku tha se ky 100-vjetor është emocionues.

“Rëndësia më e madhe e mbrëmjes së sotme është 100-vjetori, shteti shqiptar ka qenë me fat t’i themelojë urdhrat e tij nën këtë urdhër. Do ju them dhe një kuriozitet, ka qenë ëndërr e Faik Konicës, që në kohën e Turqisë, kur Konica themeloi çmimin Skënderbeu, u shpall personaliteti, por nuk u dha emri. Konica i shkruante mikut të tij, At Pashko Bardhit që kur të vijë koha të themelohet një shtet, shqiptarët duhet të krijojnë një urdhër me emrin e Skënderbeut, jo me emra shenjtorësh. I takon Skënderbeut të jetë Urdhri i Parë kur ne të kemi shtetin shqiptar. Në këtë kuptim është emocionues ky 100-vjetor. Me këtë dekorim me keni kujtuar kontributin prej 50 vjet në kulturën shqiptare”, tha Plasari.

Dekorimet e tjera:

Besim Elezi- “Ylli i Madh” i Urdhrit Suprem të Shqiponjës

Seit Mansaku- “Ylli i Madh” i Urdhrit Suprem të Shqiponjës

Pëllumb Xhufi- “Oficer i Madh” i Urdhrit Suprem të Shqiponjës

Francesco Altimari- “Oficer i Madh” i Urdhrit Suprem të Shqiponjës

Mateo Mandala- “Oficer i Madh” i Urdhrit Suprem të Shqiponjës

Ernesto Madeo- “Oficer i Madh” i Urdhrit Suprem të Shqiponjës. /CNA