“Arrestimi i Lefter Kokës nuk më bën përshtypje”/ Rama i “shkel syrin” Bashës

16 Dhjetor 2021, 07:44, Politikë CNA

Kryeministri Edi Rama, nuk i ndal replikat në rrjete sociale me qytetarët.

Së fundmi, qytetarët e kanë pyetur rreth akuzave nga kryetari i shkarkuar i PD-së Lulzim Basha, i cili fajëson Qeverinë për aferën korruptive të inceneratorëve.

Rama në përgjigjen e tij vijon të këmbëngulë se drejtësia është e pavarur dhe se çdonjëri nga Partia Socialiste duhet të mbajë vetë përgjegjësi për bëmat e tij.

Ndërsa në lidhje me Lulzim Bashën, Rama është mjaftuar duke thënë ?halle halle kjo dynja, halli hallit nuk i ngja?.

?Zoti kryeministër, në konferencën për shtyp që dha Lulzim Basha para gazetarëve, akuzat e tij ishin shumë të rënda?, komentonte një qytetarë në adresë të kryeministrit.

Rama ka reaguar me një përgjigje të gjatë, duke folur për inceneratorët, reformën në drejtësi si dhe duke përsëritur se PS nuk është avokate e askujt që përfshihet në korrupsion, duke iu referuar këtu rastit të ish-Ministrit të Mjedisit Lefter Koka.

?Halle halle kjo dynja, halli hallit nuk i ngja, thotë populli.

Por që t’i përgjigjem thelbit të komentit tënd, edhe impiantet moderne të perpunimit të mbetjeve, që i kanë hapur rrugën e shpëtimit afatgjatë nga ndotja e rëndë e plehrave zonës së Elbasanit, Tiranës e Fierit gjithashtu, edhe Reforma në Drejtesi po se po, janë vepra të shumicës sonë qeverisëse, për të cilat unë jam e do të jem gjithnjë krenar.

Kështu që euforia baltosese e atyre që bëjnë politike me akuza e me moton shpif e shpif se diçka do mbetet, për arsye të ndalimit nga SPAKU të ish-Ministrit të Mjedisit, nuk më bën asnjë përshtypje, sepse nga njëra anë investimi në Elbasan është aty, në sytë e të gjithëve e në bazë të kontratës tanimë ai është pronë publike e Bashkisë së Elbasanit, që do të shërbejë për të vazhduar mbrojtjen e zonës nga ndotja.

Ndërsa nga ana tjetër çështja e ish-Ministrit me SPAK-un dhe drejtësinë, nuk është as çështje politike, as çështje partiake, as çështje kolektive, po çështje individuale.

Ne nuk e kemi udhëhequr dhe nuk e mbështesim pa kushte Reformën në Drejtesi, si palë politike, po si forcë udhëheqëse politike e morale e shqiptarëve pa dallim, kështu që për mua e për Partine Socialiste mbetet e pandryshuar vija e kuqe e ditës së parë në detyrë: Cilidoqoftë, pa dallim partie duhet të përballet vetë me drejtësinë.

Dhe cilido qoftë ndër ne, që merret si i pandehur nga organet e pavarura të drejtësisë, duhet te ballafaqohet me drejtësinë bashkë me avokatin e vet, sepse Partia Socialiste nuk është zyrë avokatie e askujt prej nesh dhe deri në vendimin përfundimtar gjyqesor, askush ndër ne që ka punë me drejtësinë nuk mund të jetë pjesë e familjes sonë politike. Kaq.?, është shprehur Rama./E.S-CNA.al